اسلام آباد: عام انتخابات 2024 کے قریب آتے ہی الیکشن کمیشن آف پاکستان متحرک ہوگئی ہے۔

تفصیلات کے مطابق الیکشن کمیشن نے ملک بھر کے مختلف مقامات پر اشتہاری ہورڈنگز کا نوٹس لیتے ہوئے امیدواروں کو اتوار تک تمام ہورڈنگز ہٹانے کا حکم دے دیا۔

الیکشن کمیشن نے تنبیہ دیا کہ اتوار تک رضاکارانہ طور پر ہورڈنگز نہ ہٹائی گئیں تو کارروائی ہوگی، مانیٹرنگ ٹیمیں متعلقہ امیدوار کے خلاف کارروائی کریں گی۔

دوسری جانب عام انتخابات 2024 کے لئے ڈسٹرکٹ مانیٹرنگ افسران اور مانیٹرنگ ٹیموں کی تعنیاتی کا نوٹیفکیشن جاری کردیا گیا ہے، تاہم مانیٹرنگ افسران انتخابی عمل کے دوران ضابطہ اخلاق اور الیکشن قوانین کی مانیٹرنگ کریں گی، کسی بھی خلاف ورزی کی صورت میں قانونی کارروائی عمل میں لائی جائے گی۔

الیکشن کمیشن نے بتایا کہ ڈسٹرکٹ مانیٹرنگ افسران و مانیٹرنگ ٹیمیں تمام اضلاع میں انتخابی عمل اور انتخابی مہم کی کڑی نگرانی کریں گی، ڈویژنل سطح پر ریجنل مانیٹرنگ کوآرڈینیٹر بھی تعنیات کر دیے گئے ہیں۔

واضح رہے کہ الیکشن کمیشن کی جانب سے عام انتخابات 2024 میں حصہ لینے کے لئے کاغذات نامزدگی کی وصولی اور جمع کروانے کا وقت بڑھا دیا گیا ہے، الیکشن کمیشن نے کاغذات نامزدگی جمع کروانے کے وقت میں 2 دن کا اضافہ کر دیا ہے، کاغذات نامزدگی اب 24 دسمبر تک جمع کرائے جاسکیں گے۔

الیکشن کمیشن آف پاکستان کے جاری کردہ شیڈول کے مطابق امیدواروں کی ابتدائی فہرست کل جاری کی جائے گی، تاہم اتوار سے شروع ہونے والے کاغذات نامزدگی کی جانچ پڑتال رواں ماہ کی 30 تاریخ تک جاری رہے گی۔

بعدازاں الیکشن کمیشن کا کہنا تھا کہ کاغذات نامزدگی پراعتراضات 3 جنوری تک دائر کیے جا سکیں گے، کاغذات نامزدگی کےخلاف اپیلیں 10 جنوری تک سنی جائیں گی، امیدواروں کی نظر ثانی شدہ فہرست 11 جنوری 2024 کو جاری کی جائے گی۔

الیکشن کمیشن کے مطابق 13 جنوری کو امیدواروں کو انتخابی نشان الاٹ کیے جائیں گے، ملک بھر میں عام انتخابات کیلئے پولنگ 8 فروری کو ہوگی۔