پی پی پی چیئرمین بلاول بھٹو زرداری نےاسلامی دنیا کی پہلی منتخب خاتون وزیراعظم اورعالمی لیڈرشہید محترمہ بینظیر بھٹوکی برسی پرقوم کے نام پیغام میں خراجِ عقیدت پیش کیا۔

سابق وفاقی وزیرخارجہ نے پیغام میں کہا کہ شہید محترمہ بینظیربھٹو نہ صرف ایک تاریخی شخصیت بلکہ ایک زندہ تحریک اور مشعلِ راہ ہیں، ان کے حب الوطنی، پائیدار جدوجہد اور ثابت قدم قیادت کے نقوش قوم کے دل و دماغ میں ہمیشہ انمٹ رہیں گے۔

 بلاول بھٹو زرداری نے کہا کہ میری والدہ ملک کو ایک حقیقی فلاحی ریاست بنانے کے عظیم مقصد کے لیے ہمیشہ پرعزم رہیں، شہید محترمہ بینظیربھٹو پنجاب، سندھ، خیبر پختونخوا، بلوچستان، کشمیر اور گلگت بلتستان کے لیے ہم آہنگی کی زنجیر تھیں۔ ان کا بہیمانہ قتل ایک مذموم سازش تھی۔

چیئرمین پیپلزپارٹی نے کہا کہ شہید محترمہ بینظیربھٹو کے قتل ذریعے پاکستان کی ترقی کو سبوتاژ کیا گیا، شہید محترمہ بینظیر بھٹو کے قتل کے ذریعے روشن خیال، اعتدال پسندی و جمہوری معاشرے کے قیام کی حکمت عملی کو نشانہ بنایا گیا، شہید محترمہ بینظیر بھٹو نے فکر بھٹو اور پارٹی کو اپنے فلسفے اور بے مثال جدوجہد کے ذریعے نئی بلندیوں تک پہنچایا۔

بلاول بھٹو زرداری نے پیغام میں کہا کہ شہید محترمہ بینظیر بھٹو نے ہمیشہ ملک کے عام آدمی اور پسماندہ طبقات کی آواز بن کر حقیقی عوام کی نمائندگی کی، شہید محترمہ بینظیر بھٹو نے بطور وزیر اعظم قوم کو بیلسٹک میزائل ٹیکنالوجی کا تحفہ دے کر ملکی دفاع کو مزید مضبوط کیا، شہید محترمہ بینظیربھٹو نے ملک کے تنخواہ دار طبقے، کسانوں، مزدوروں، اقلیتوں، خواتین، بچوں اور بزرگوں کے حقوق کا تحفظ کیا۔

انھوں نے کہا کہ شہید محترمہ بینظیر بھٹو نے ملک کے غریب شہریوں اور پسماندہ طبقات کی فلاح و بہبود اور ترقی کو یقینی بنانے کے لیے دور رس اقدامات کیے، آئندہ عام انتخابات کے حوالے سے پاکستان پیپلز پارٹی کا منشور قائدِ عوام اور شہید محترمہ بینظیر بھٹو کی بصیرت افروز امنگوں اور مشن کا عکس ہوگا۔ پاکستان پیپلز پارٹی اپنی شہید قیادت کے فلسفے پر سختی سے کاربند رہے گی۔

سابق وزیرخارجہ نے مزید کہا کہ پاکستان پیپلز پارٹی شہید محترمہ بینظیر بھٹو کے خواب کو حقیقت کا روپ دینے کے لیے پرعزم ہے، یہ شہید محترمہ بینظیر بھٹو کا خواب تھا کہ پاکستان دنیا کے لیے خوشحال، ترقی پسند، مساوات پر مبنی اور مضبوط جمہوری وفاقی ریاست کے طور پر ایک اعلیٰ مثال ہو۔