قومی ٹیم کے سابق کپتان شاہد آفریدی کا کہنا ہے کہ بابراعظم بہت مستقل مزاجی کے ساتھ پرفارمنس دیتے ہیں جو میں نے بہت کم دیکھا ہے۔

میلبرن کرکٹ گراؤنڈ کے باہر میڈیا سے گفتگو کرتے ہوئے پاکستان کرکٹ ٹیم کے سابق چیف سلیکٹر اور کپتان شاہد آفریدی نے کہا کہ بابراعظم جیسا کھلاڑی نہیں دیکھا جو مستقل مزاجی سے کارکردگی دکھاتا رہے تاہم کسی کی خراب فارم کی وجہ سے اسے پوری سیریز میں باہر نہیں بٹھایا جاسکتا۔

انہوں نے کہا کہ آؤٹ آف فارم کھلاڑی کو ایک دو میچوں کے لیے تو آرام دیا جاسکتا ہے لیکن پوری سیزیز سے باہر نہیں کیا جاسکتا جب کہ شاہین آفریدی، محمد رضوان اور بابراعظم بڑے کھلاڑی ہیں، انہوں نے پاکستان کو پہلے بھی میچز جتوائے ہیں اور آگے بھی اچھا کھیل پیش کریں گے۔

ایک سوال کے جواب میں انہوں نے کہا کہ بھارت میں ہونے والے ورلڈکپ میں شاہین آفریدی اور نسیم شاہ کی جوڑی کو سب نے مس کیا، ان کی جوڑی بہت کامیاب چل رہی تھی لیکن پھر نسیم شاہ انجرڈ ہوگئے۔

شاہد آفریدی کا کہنا تھا کہ شاہین آفریدی نے مجھے اپنی انجری کے حوالے سے کبھی کچھ نہیں بتایا اور اگر کوئی فاسٹ بولر انجری کا شکار ہے تو وہ کرکٹ کھیل ہی نہیں سکتا، کیوں کہ ہر میچ میں پرفارم کرنا اور لمبے اسپیل کروانا ممکن نہیں ہوتا۔

دورہ نیوزی لینڈ کے لیے محمد حارث کو سلیکٹ نہ کرنے سے متعلق سوال پر شاہد آفریدی نے کہا کہ نیا سیٹ اپ آیا ہے، محمد حفیظ اور وہاب ریاض نے بہت کرکٹ کھیلی ہے، امید کرتے ہیں وہ اچھی سلیکشن کریں گے اور ایسے فیصلے لیں گے جس سے ٹیم اور ملک کا فائدہ ہو لیکن اب جو ٹیم سلیکٹ ہوگئی ہے ہمیں اس کو سپورٹ کرنا چاہیے۔

حارث رؤف سے متعلق سوال پر شاہد آفریدی نے کہا کہ حارث رؤف میلبرن ٹیسٹ کی کنڈیشنز میں بولنگ کراتے تو ضرور انجوائے کرتے لیکن وہ سیریز نہیں کھیل رہے۔