وزیراعظم کے معاون خصوصی برائے اوورسیز زلفی بخاری سے چین میں موجود پاکستانی طلبہ کے والدین کی  ملاقات ہوئی۔

ملاقات میں والدین نے چین میں پاکستانی طلبہ کیلئے ادویات کی عدم فراہمی کی شکایات کی جس پر زلفی بخاری نے ادویات کی فراہمی یقینی بنانےکی ہدایت کرتے ہوئے آئندہ ہفتےتک تمام طلبہ کی رپورٹ پیش کرنے کا حکم دے دیا۔

معاون خصوصی برائے اوورسیز زلفی بخاری نے کہا کہ چین واحد ملک ہےجہاں کورونا وائرس کم ہو رہا ہے  جبکہ  دنیا گواہ ہےچین کوروناوائرس سےبہترین طریقے سے لڑ رہا ہے ۔

زلفی بخاری نے  یہ بھی کہا کہ پاکستانی طلبہ چین میں زیادہ توجہ کا مرکز ہیں جبکہ پاکستانی طلبہ کو واپس نہ لانامشکل فیصلہ تھا اور وقت ثابت کررہا ہےحکومت کا فیصلہ درست تھا، آپ سے وعدہ کیا ہے چین میں بچوں کا خیال رکھیں گے۔

پاکستان میں کوروناوائرس کے متاثرہ افراد کی تعداد 299 ہوگئی

وزیراعظم کے معاون خصوصی برائے اوورسیز زلفی بخاری نے  مزید کہا کہ 1179میں سے993 بچوں کومالی مدد بھیج دی گئی ہے، 935بچوں نے رقوم کی وصولی کی تصدیق کردی ہے،1179طلبہ کیلئے15دن کا امدادی سامان کل روانہ ہوگا۔

قبل ازیں وفاق نے چین کے شہر ووہان میں پھنسے پاکستانی طلبا کو پاکستانی کھانا بھیجنے کا فیصلہ کیا ہے۔ اس مقصد کے لیے نیشنل ڈیزاسٹر مینجمنٹ اتھارٹی (این ڈی ایم اے) ووہان میں مقیم پاکستانوں کے لیے تیار کھانا ارسال کر رہا ہے۔

خیال رہے کہ وزیر اعظم عمران خان نے ووہان میں موجود طلبا سمیت ہر پاکستانی شہری کا خصوصی خیال رکھنے کی ہدایت کی ہے۔ وزیر اعظم نے کہا تھا کہ دفتر خارجہ اور فارن مشن چین میں موجود ہم وطنوں کے ساتھ مسلسل رابطے میں رہے۔

واضح رہے اس سے قبل وزیراعظم عمران خان سے معاون خصوصی برائے صحت ڈاکٹر ظفر مرزا اور معاون خصوصی برائے اوورسیز پاکستانیزسید ذوالفقار عباس بخاری کی ملاقات ہوئی تھی۔

ملاقا ت میں وزیرِ اعظم عمران خان نے پاکستانی طلبا کی صحت کے بارے میں بھی تفصیلی بریفنگ لی جبکہ چین میں موجود پاکستانیوں خصوصاً ووہان میں موجود پاکستانی طلبا کی تمام تفصیلات  اور موجودہ صورتحال  دریافت کی تھی۔