پاکستان کرکٹ ٹیم کے ڈائریکٹر محمد حفیظ نے کپتان شان مسعود کے فیصلے پر اعتراض اٹھادیا ہے۔

پاکستان اور آسٹریلیا کی ٹیموں کے درمیان تین ٹیسٹ میچز پر مشتمل سیریز کھیلی گئی جس میں پاکستان کو وائٹ واش کر سامنا کرنا پڑا۔

پاکستان کی جانب سے نوجوان فاسٹ بولر عامر جمال نے عمدہ بیٹنگ اور بولنگ کا مظاہرہ کیا اور 18 وکٹوں کے ساتھ وہ دوسرے کامیاب ترین بولر قرار پائے۔

تیسرے ٹیسٹ کی پہلی اننگز میں پاکستان نے عامر جمال کے جارحانہ 82 رنز کی بدولت 313 رنز اسکور کیے جس کے جواب میں آسٹریلیا کی ٹیم 299 رنز پر ڈھیر ہوگئی۔

پاکستان نے 14 رنز کی برتری کے ساتھ دوسری اننگز شروع کی تو پوری ٹیم صرف 115 رنز پر ہی آل آؤٹ ہوگئی جب کہ آسٹریلیا نے 130 رنز کا ہدف باآسانی حاصل کرلیا۔

دوسری اننگز میں عامر جمال کو دیر سے اوور دینے پر پاکستان کرکٹ ٹیم کے ڈائریکٹر محمد حفیظ نے شان مسعود کی کپتانی پر اعتراض اٹھادیا۔

میچ سے کے بعد میڈیا سے گفتگو کرتے ہوئے محمد حفیظ نے کہا کہ عامر جمال کو پہلے بولنگ دینا چاہیے تھی، بہرحال یہ کپتان کی صوابدید ہوتی ہے۔

انہوں نے یہ بھی کہا کہ میدان کے اندر کی صورت حال کپتان ہی بہتر جانتا ہے اور انہوں نے آف اسپنر کو ترجیح دی۔

محمد حفیظ نے مزید کہا کہ شان مسعود کو فیصلوں کا حق حاصل ہے اور مجموعی طور پر انہوں نے سیریز میں وقت پر درست فیصلے کیے۔