اسلام آباد: نگران وزیر اعظم انوار الحق کاکڑ نے صحت کی ہنگامی صورتحال سے نمٹنے کے لیے بین الاقوامی سطح پر زیادہ سے زیادہ تعاون بڑھانے پر زور دیا ہے۔

نگران وزیر اعظم انوار الحق کاکڑ نے اسلام آباد میں عالمی صحت سلامتی سربراہی اجلاس کی افتتاح تقریب سے خطاب کرتے ہوئے کہا کہ قومی حکمت عملیوں سے ہٹ کر ہمیں عالمی فنڈنگ ​​کے لیے ایسے طریقہ کار تلاش کرنے کی ضرورت ہے جو کسی ضرورت مند قوم کی مدد کر سکیں۔

انہوں نے کہا کہ صحت کی حفاظت کے لیے ہمارے حصول میں کوئی بھی پیچھے نہ رہے، صحت کی حفاظت کوئی استحقاق نہیں بلکہ ایک عالمی حق ہے۔

انوار الحق کاکڑ نے کہا کہ صحت کی لیبارٹریوں کے بین الاقوامی نیٹ ورک کا قیام بہترین طریقوں اور وسائل کو بانٹنے سے ابھرتے ہوئے خطرات کے خلاف ہمارے اجتماعی دفاع میں معاون ثابت ہو سکتا ہے۔

نگران وزیر اعظم نے کوویڈ 19 جیسی نئی بیماریاں، موسمیاتی واقعات، صحت کی پالیسیوں اور نظاموں میں موسمیاتی لچک کو ضم کرنے کی اہمیت پر زور دیا اور کہا کہ کووڈ-19 نے ہمیں تعاون، تیاری اور متحد نقطہ نظر کی اہمیت کے بارے میں انمول سبق سکھائے ہیں۔

انکا کہنا تھا کہ ہمارے عزم کو ایسے عالمی فریم ورک کے قیام کے لیے بڑھانا چاہیے جو ہنگامی حالات کے دوران موثر ردعمل کے لیے معلومات کے تبادلے، مشترکہ تحقیق اور باہمی تعاون کی حکمت عملیوں میں سہولت فراہم کریں۔

انہوں نے مزید کہا کہ ہمارا اجتماعی نقطہ نظر صرف بحرانوں پر ردعمل ظاہر کرنے کے بارے میں نہیں ہونا چاہیے بلکہ ایک فعال اور باہم مربوط عالمی صحت کے ماحولیاتی نظام کو تشکیل دینا چاہیے۔

نگران وزیر اعظم نے خوراک کی حفاظت کے لیے بین الاقوامی معیارات قائم کرنے اور دنیا بھر میں آبادی کے لیے اعلیٰ ترین سطح کے تحفظ کو یقینی بنانے کے لیے ضوابط کو ہم آہنگ کرنے کی ضرورت پر بھی زور دیا۔