سعودی عرب میں گزشتہ برس 1 کروڑ 35 لاکھ 50 ہزار زائرین نے عمرے کی سعادت حاصل کرکے نیا ریکارڈ قائم کردیا۔

سعودی وزیر حج وعمرہ ڈاکٹر توفیق الربیعہ نے حج و عمرہ کانفرنس کے افتتاحی اجلاس سے خطاب کیا اور اس دوران انہوں نے یہ اعلان کیا کہ سال 2023 عمرہ زائرین کی تعداد کے لحاظ سے ریکارڈ ساز سال رہا ۔

انہوں نے بتایا کہ سال 2023 میں 1 کروڑ 35 لاکھ 50 ہزار زائرین نے عمرے کی سعادت حاصل کی اور یہ تعداد 2022 کے عمرہ زائرین کے مقابلے میں 58 فیصد زیادہ تھی۔

وزیر حج و عمرہ ڈاکٹر توفیق الربیعہ کا کہنا تھا کہ 2019 میں سعودی عرب آنے والے زائرین کی سب سے زیادہ تعداد ساڑھے 8 ملین تھی لیکن گزشتہ سال یہ ریکارڈ ٹوٹ گیا۔

ڈاکٹر توفیق الربیعہ نے بتایا کہ گزشتہ برس میں ساڑھے 13 ملین عمرہ زائرین کی سعادت حاصل کی اور یہ سب بہترین عمرہ سہولیات کی فراہمی کے مربوط اور نقائص سے پاک نظام کے باعث ممکن ہوا۔

ڈاکٹر توفیق الربیعہ نے امید ظاہر کی کہ دنیا بھر سے آنے والے عمرہ زائرین کی تعداد میں ہر سال مزید اضافہ ہوگا اور اس بات کو یقینی بنانے کے لیے 1.3 بلین ڈالر سے زائد ترقیاتی منصوبوں پر کام جاری ہے۔

سعودی وزیر حج وعمرہ کے مطابق ان منصوبوں سے عمرہ زائرین کے لیے گنجائش اور سہولیات میں بے پناہ اضافہ ہوجائے گا۔

خیال رہے کہ وزارت مذہبی امور کی جانب سے سرکاری اسکیم کے تحت 21 ہزار سے زائد حج کوٹہ سعودی عرب کو واپس کرنے کی تیاریاں کی جارہی ہیں۔

سرکاری حج اسکیم کے تحت ہی درخواست دینے والے سوا 5 ہزار پاکستانیوں کو حج پر نہیں بھجوایا جائے گا جب کہ ریگولر حج اسکیم کے تحت 5ہزار 6سو33 درخواست دہندہ حج سے محروم رہ جائیں گے۔

ذرائع کا بتانا ہے کہ آئندہ برس کے لئے حج قرعہ اندازی میں 5ہزار 633 درخواست دہندہ ناکام قرار پائے تھے تاہم سرکاری ریگولر اسکیم کے عازمین حج کو ایڈجسٹ کرنے کے بجائے رقم واپس کر دی گئی ہے