لاہور: خواتین امپائرز انڈکشن کورس قذافی اسٹیڈیم لاہور میں اختتام پذیر ہوگیا۔

خواتین امپائرز انڈکشن کورس قذافی اسٹیڈیم لاہور میں آج اختتام پذیر ہوگیا ہے جس میں پاکستان ویمنز کرکٹ ٹیم کی کپتان ندا ڈار اور سابق انٹرنیشنل کرکٹر سخن فیض سمیت 13 شرکاء نے شرکت کی۔

شرکت کرنے والوں میں عمارہ خان، عائشہ فاروق، عائشہ شکور، فاخرہ کاظمی، اسماء، قرۃ العین، ثانیہ اشرف، شمائلہ ناز، سمیرا ساجد، ذکیہ گل اور زبیدہ ستار شامل تھیں۔

Nida Dar among 13 participants take part in Female Umpires induction course

Advertisement

Read details here ⤵️ https://t.co/ay7MKntkj8

— PCB Media (@TheRealPCBMedia) January 16, 2024

چار روزہ کورس کا آغاز 13 جنوری سے ہوا جس میں 13 خواتین شرکاء نے کھیل کے قوانین کی معلومات سمیت بنیادی تربیتی سیشنز میں شرکت کی۔ آخری دن شرکاء نے تحریری امتحان دیا اور ان کے ون آن ون انٹرویوز ہوئے۔

آئی سی سی کے ایلٹ پینل آف امپائرز کے ممبر احسن رضا اور پی سی بی کے انٹرنیشنل امپائر آصف یعقوب اس کورس کے انسٹرکٹر تھے۔

ندا ڈار کا کہنا ہے ’’یہ ایک بہت اہم کورس تھا کیونکہ اس نے مجھے کھیل کے قوانین کو زیادہ باریک بینی سے سمجھنے میں مدد کی۔ دوسری بات میں نوجوان لڑکیوں کے لیے رول ماڈل بننا چاہتی تھی اور انہیں امپائرنگ کے میدان میں آنے کی ترغیب دینا چاہتی تھی‘‘۔

انہوں نے مزید کہا ’’کورس میں ایلٹ پینل کے امپائرز کے اشتراک سے تجربات بہت قیمتی تھے اور مستقبل میں ہم سب کے لیے مددگار ثابت ہوں گے‘‘۔

احسن رضا کا کہنا ہے کہ چار روزہ کورس میں بطور انسٹرکٹرز ہم نے آج کے دور میں پلیئنگ کنڈیشنز، قوانین اور پریکٹیکل امپائرنگ پر تبادلہ خیال کیا۔

احسن رضا نے بتایا کہ ہم نے گراؤنڈ میں انٹرایکٹو پریکٹیکل سیشنز کیے جب کہ شرکاء کو ویڈیو کلپس کے ذریعے امپائرنگ کے بارے میں معلومات فراہم کی گئیں۔