حوثیوں کے حملوں کے بعد عالمی معیشت پر خطرات کے بادل منڈلانے لگے ہیں۔

غزہ کی جنگ اب غزہ تک محدود نہیں رہی، اب اس جنگ کے عالمی جنگ نہ سہی لیکن ایک علاقائی جنگ میں بدلنے کا خدشہ کافی حد تک بڑھ چکا ہے۔

ایک طرف تو اسرائیل کے غزہ پر حملے جاری ہیں تو دوسری طرف یمن کی حوثی ملیشیا امریکہ اور برطانیہ کے فضائی حملوں کے باوجود کسی طور اپنی کارروائیوں سے باز نہیں آرہی۔

حوثیوں کی جانب سے امریکی کنٹینر شپس پر تازہ ترین بیلسٹک میزائل حملہ اس بات کو ظاہر کرتا ہے کہ حوثی فی الحال امریکی دھمکیوں اور حملوں سے ڈرنے والے نہیں۔ حوثیوں کا واضح موقف ہے کہ اسرائیل سے آنے اور جانے والے تجارتی جہازوں پر حملے جاری رہیں گے۔

اب یہاں کئی سوال جنم لیتے ہیں لیکن ان سوالات اور ان کے جوابات سے پہلے یہ بات جاننا ضروری ہے کہ بحیرہ روم کو بذریعہ سویز کینال بحیرہ عرب سے جوڑنے والے سمندر کا نام بحیرہ احمر ہے جس کے ایک سرے پر صومالیہ کے بحری قزاقوں نے اودھم مچا رکھا تھا اور اب حوثی بھی عالمی بحری تجارت کو درہم برہم کرنے کے لئے میدان میں آچکے ہیں۔

بلاشبہ حوثیوں کا نشانہ اسرائیل ہے لیکن یہ معاملہ اتنا سادہ نہیں، بحیرہ احمر سے عالمی سامان تجارت کا 12 فیصد گزرتا ہے اور عالمی سپلائی چین میں شامل 35 ملین بیرل خام تیل کو نہر سوئز سے مختصر راستے کے بجائے پورے براعظم افریقہ کے گرد گھوم کر یورپ پہنچایا جا رہا ہے کیونکہ تجارتی جہاز ران کمپنیز کسی قسم کا رسک لینے کو تیار نہیں ہیں۔

دوسری طرف لیبیا میں ہونے والے احتجاج کے باعث 3 لاکھ بیرل خام تیل کی پیداوار متاثر ہوئی ہے، امریکہ اور کینیڈا میں بگ فریز کے باعث 4 سے سوا 4 لاکھ بیرل خام تیل کی پیداوار عارضی طور پر بند کی جاچکی ہے۔

ایسے میں حوثیوں کی کوئی بھی سخت کارروائی دنیا میں معاشی طوفان برپا کرسکتی ہے۔ بحیرہ احمر میں امریکی بحریہ کے ڈیسٹرائر اور اس کے بعد تجارتی بحری جہاز پر حملے کے بعد اب یہ بات واضح ہو چکی ہے کہ اگر یہ حملے نہ رکے تو اسرائیل کو تکلیف ہو یا نہ ہو دنیا کہ وہ ملک جن کی درآمدات و برآمدات بحیرہ احمر سے گزرتی ہیں وہ ضرور متاثر ہوں گے۔

اسرائیل کو فی الحال حوثی حملوں سے کوئی براہ راست نقصان نہیں ہوا کیونکہ اسرائیل کی زیادہ تر تجارت بحیرہ روم کی بندرگاہوں سے ہوتی لیکن ماہرین کا کہنا ہے کہ حوثی حملوں کے اسرائیلی معیشت پر دور رس اثرات مرتب ہوں گے۔

حوثی اہم ترین تجارتی گزرگاہ خلیج باب المندب میں درجنوں حملے کرچکے ہیں۔ امریکہ اور اس کے اتحادی ٹاسک فورس 153 کے تحت بحیرہ احمر میں کئی جنگی جہازوں کو متحرک کرچکے ہیں لیکن حوثیوں کی پالیسی واضح ہے کہ غزہ پر اسرائیلی جارحیت بند ہونے تک ان کے حملے بھی بند نہیں ہوں گے۔

ایشیا اور یورپ کو ملانے والے بحیرہ احمر سے یومیہ اوسط کے مطابق 50 کے لگ بھگ تجارتی جہاز 6 سے 9 ارب ڈالر مالیت کا سامان لے کر گزرتے ہیں جو سالانہ ایک کھرب ڈالر بن جاتے ہیں سو اس معاملے کو ایسے نہیں چھوڑا جا سکتا۔

اب تک حوثیوں کے حملے میں امریکہ یا اس کے کسی مغربی اتحادی کا جانی نقصان نہیں ہوا دوسری طرف شام اور عراق میں ایرانی حمایت یافتہ ملیشیاز ہلکے پھلکے حملوں سے شاید وارم اپ ہو رہی ہیں۔

لبنان میں بیٹھی حزب اللہ اسرائیل پر ڈرون اور راکٹ حملے بھی کرچکی ہے، سو ماہرین کے مطابق کسی بھی وقت کوئی بھی گڑبڑ ہو سکتی ہے۔امریکہ اور برطانیہ کی جانب سے حوثیوں کے ساتھ تنازعے کو شدت دی جاتی رہی تو ان کی جوابی کارروائی میں بھی تیزی آئے گی۔

غزہ جنگ سے پہلے ایک طرف سعودی عرب اور اسرائیل پینگیں بڑھا رہے تھے تو ساتھ ہی سعودی عرب نہ صرف ایران بلکہ حوثیوں کے ساتھ بھی تعلقات کو درست کرنے یا معمول پر لانے کی کوششوں میں مصروف تھا۔

ایسے میں حوثی یقیناً امریکہ اور برطانیہ کے نزدیک آگ سے کھیل رہے ہیں، دونوں کی جانب سے حوثیوں کو کافی وارننگز بھی دی جاچکی ہیں۔