نگران وزیر اعظم انوار الحق کاکڑ نے کہا ہے کہ پاک سعودیہ قریبی تعلقات خطے میں استحکام کی ایک وجہ ہیں۔

وزیر اعظم انوار الحق کاکڑ اور سعودی وزیر خارجہ فیصل بن فرحان بن عبداللہ کے درمیان ڈیووس میں ملاقات ہوئی ہے۔

اس موقع پر انوار الحق کاکڑ نے گفتگو کرتے ہوئے کہا کہ پاک سعودیہ قریبی برادرانہ تعلقات کی اسٹریٹجک اہمیت کے حامل ہیں، پاکستان اور سعودی عرب کے درمیان قریبی تعلقات خطے میں استحکام کی ایک وجہ ہیں۔

نگران وزیر اعظم نے مزید کہا کہ پاکستان خادم الحرمین شریفین اور سعودی عرب کو انتہائی قدر کی نگاہ سے دیکھتا ہے۔

دوسری جانب پاک ایران کشیدگی کے پیش نظر  انوار الحق کاکڑ نے اپنا غیر ملکی دورہ مختصر کر دیا ہے، نگران وزیر اعظم انوارالحق کاکڑ آج سوئٹزرلینڈ سے وطن واپس پہنچیں گے۔

یہ بھی پڑھیں: ایران کے میزائل حملے کے جواب میں پاکستان کا کرارا جواب

ذرائع نے بتایا کہ نگران وزیر اعظم کی زیر صدارت پاک ایران کشیدگی پر خصوصی اجلاس ہوگا، تاہم انوار الحق کاکڑ کو وطن واپسی پر پاک ایران سرحدی صورتحال پر تفصیلی بریفنگ دی جائے گی۔

واضح رہے کہ پیر کے روز ایرانی سیکیورٹی فورسز کی جانب سے پاکستان کی فضائی حدود کی خلاف ورزی کرتے ہوئے بلوچستان میں میزائل اور ڈرون حملے کیے گئے تھے۔

ایران کی جانب سے دعویٰ کیا گیا تھا کہ ایرانی سیکیورٹی فورسز کی جانب سے پاکستان کے صوبے بلوچستان میں جیش العدل نامی تنظیم کے دو ٹھکانوں پر میزائل اور ڈرون حملے کیے گئے۔

گزشتہ روز دفتر خارجہ نے ایران کی جانب سے پاکستان کی فضائی حدود کی خلاف ورزی کی شدید مذمت کرتے ہوئے ایرانی ناظم الامور کو وزارت خارجہ طلب کیا تھا۔

دفتر خارجہ کا کہنا تھا کہ پاکستان کی خود مختاری کی یہ خلاف ورزی مکمل طور پر ناقابلِ قبول ہے اور اس کے سنگین نتائج نکل سکتے ہیں جس کی ذمے داری ایران پر ہی عائد ہو گی۔