نگران وزیر اطلاعات بلوچستان جان اچکزئی نے کہا ہے کہ اسلام آباد میں گمشدہ بلوچوں کی نوٹنکی لگانے والے بے نقاب ہوگئے۔

جان اچکزئی نے کوئٹہ میں پریس کانفرنس کرتے ہوئے کہا کہ مسلح افواج نے پاکستان کی سلامتی اور خود مختاری کو چیلنج کرنے والے عناصر کو بھرپور جواب دیا، پاک افواج نے آرمی چیف کی قیادت میں قوم کا سر فخر سے بلند کردیا ہے، اس پر پوری قوم اور خاص کر اہل بلوچستان ان کے تہہ دل سے شکرگزار ہیں۔

انہوں نے کہا کہ جنرل عاصم منیر کے اس ایکشن سے بھارت کی دہشت گردی کا نیٹ ورک بےنقاب ہوگیا، اسلام آباد میں گمشدہ بلوچوں کی نوٹنکی لگانے والے افراد بھی بری طرح بےنقاب ہوگئے، اسلام آباد میں بلوچ خواتین کا بھارت میں تیار ہونے والا ڈرامہ بری طرح فلاپ ہوگیا۔

نگران وزیر نے کہا کہ ہم بار بار کہہ رہے تھے کہ مسنگ پرسنز کا مسئلہ حل ہورہا ہے، ماہ رنگ بلوچوں سے محبت کرنے والی پاکستانی عوام کو گمراہ کرنے کی کوشش میں بے نقاب ہوگئی، ماہ رنگ کے جھوٹ کا پردہ خود اس کی پریس کانفرنس سے اٹھ گیا، ماہ رنگ کا دعوی تھا کہ ایران میں مرنے والے دہشت گردوں کے لواحقین اسلام آباد کے کیمپ میں موجود ہیں۔

انکا کہنا ہے کہ ایران نے بھی پاکستان کے جوابی حملہ میں دہشت گردوں کے مارے جانے کی تصدیق کی ہے، ماہ رنگ نے بھی اس کی تصدیق کردی ہے۔

جان اچکزئی نے مزید کہا کہ علیحدگی پسند اور دہشتگرد تنظیموں کے افراد ایران میں بھارت سے ساز باز کر کے پاکستان کے خلاف سازشیں کررہے تھے، ماہ رنگ کے سہولت کار بھی اپنے قومی اداروں اور فورسز کو بدنام کرنے پر پیش پیش تھے، میں ان سے سوال کرنا چاہتا ہوں کیا وہ لوگ بھی پاکستان دشمن قوتوں کے ہاتھ میں کھیل رہے ہیں، اگر وہ گمراہی کا شکار تھے تو خلوص دل سے قوم سے معافی مانگ لیں۔