امریکی فوج نے صومالیہ میں سمندری حملے میں ہلاک ہونے والے 2 نیوی اہلکاروں کی تصدیق کر دی ہے۔

تفصیلات کے مطابق امریکی فوج کا کہنا ہے کہ بحیرہ عرب میں بحری جہاز پر سوار ہونے اور ایرانی ساختہ اسلحہ ضبط کرنے کے مشن کے دوران گم ہونے والے بحریہ کے دو نیوی اہلکاروں کو بچانے کے لیے 10 روز سے جاری تلاش ختم ہو گئی ہے اور اب ان ملاحوں کو مردہ سمجھا جا رہا ہے۔

امریکی سینٹرل کمانڈ نے ایک بیان میں کہا ہے کہ تلاش کا عمل اب بحالی کی کوشش میں تبدیل کر دیا گیا ہے۔ سینٹرل کمنڈ نے نیوی اہلکاروں کے نام جاری نہیں کئے ہیں۔

امریکی فوج کا کہنا ہے کہ امریکا، جاپان اور اسپین کے بحری جہازوں اور طیاروں نے فلیٹ نیومیرولوجیکل میٹرولوجی اینڈ اوشنوگرافی سینٹر، امریکی کوسٹ گارڈ اٹلانٹک ایریا کمانڈ، یونیورسٹی آف سان ڈیاگو- اسکرپٹس انسٹی ٹیوٹ آف اوشینوگرافی اور آفس آف نیول ریسرچ کی مدد سے 21 ہزار مربع میل سے زائد علاقے کی مسلسل تلاشی لی۔

امریکی سینٹرل کمانڈ کے سربراہ جنرل ایرک کریلا نے کہا کہ ہم اپنے دو نیول اسپیشل وارفیئر جنگجوؤں کی ہلاکت پر سوگ مناتے ہیں اور ہم ان کی قربانیوں اور مثال کو ہمیشہ یاد رکھیں گے۔

جنرل ایرک کریلا نے کہا کہ اس دوران ہماری دعائیں سیلز کے اہل خانہ، دوستوں، امریکی بحریہ اور پوری اسپیشل آپریشنز کمیونٹی کے ساتھ ہیں۔

حکام کے مطابق 11 جنوری کے حملے میں یمن میں حوثی باغیوں کے لیے غیر قانونی ایرانی ساختہ ہتھیار لے جانے والے ایک بحری جہاز کو نشانہ بنایا گیا تھا۔

حکام کا کہنا ہے کہ جب ٹیم جہاز پر سوار ہو رہی تھی تو ان میں سے ایک نیوی اہلکار سمندر میں ڈوب تھا جسے بچانے کے لیے اس کا ساتھی سمندر میں کودا تھا۔