چین میں آج 7.2 شدت کے زلزلے سے زمین لرز اٹھی، جبکہ زلزلے کے جھٹکے بھارت میں بھی محسوس کیے گئے۔

بھارتی میڈیا کے مطابق بھارت کے نیشنل سینٹر آف سیسمولوجی نے سماجی رابطے کی ویب سائٹ پر ایک پوسٹ میں کہا ہے کہ زلزلے کا مرکز زمین سے 80 کلومیٹر کی گہرائی میں تھا۔

دہلی اور گردونواح کےعلاقہ میں آج دیر شام زلزلے کے شدید جھٹکے محسوس کیے گئے جبکہ چین کے صوبے سنکیانگ کے جنوبی حصے میں 7.2 شدت کے زلزلے کے جھٹکے محسوس کیے گئے۔ کسی جانی یا مالی نقصان کی کوئی اطلاع نہیں ہے۔

واضح رہے کہ دہلی اور این سی آر میں آخری بار 11 جنوری کو 6.1 شدت کے زلزلے کے جھٹکے محسوس کیے گئے تھے۔ زلزلے کا مرکز کابل سے 241 کلومیٹر شمال مشرق میں تھا۔ زلزلے کے جھٹکے پاکستان میں بھی محسوس کیے گئے۔

اس سے قبل آج جنوب مغربی چین کے دور دراز اور پہاڑی علاقے میں زلزلے کے شدید جھٹکے محسوس کیے گئے تھے جس میں 47 افراد دب گئے تھے۔ سرکاری نشریاتی ادارے کے مطابق علاقے سے 200 سے زائد افراد کو فوری طور پر نکال لیا گیا ہے۔

سرکاری خبر رساں ادارے نے مقامی حکام کے حوالے سے بتایا کہ لینڈ سلائیڈنگ کا یہ واقعہ مقامی وقت کے مطابق صبح 5 بج کر 51 منٹ پر صوبہ یوننان کی ژینشیونگ کاؤنٹی میں پیش آیا۔