لاہور: آٹھ فروری کو ہونے والے عام انتخابات کے پیش نظر شہید محترمہ بینظیر بھٹو کی صاحبزادی بی بی آصفہ بھٹو زرداری آج مصروف ترین دن گزاریں گی۔

آصفہ بھٹو زرداری آج 12 بجے مادر ملت روڈ پر این اے 127 کے مرکزی انتخابی دفتر کا افتتاح کریں گی اور 2 بجے پی پی 160 سے پیپلز پارٹی کے امیدوار میاں مصباح الرحمان کے زیر اہتمام رائے روڈ پر ورکرز کنونشن میں شرکت کریں گی۔

اس کے بعد آصفہ بھٹو ایف جی اے گراؤنڈ بہار کالونی میں پی پی 160 سے پیپلز پارٹی کے امیدوار فیصل میر کے زیر اہتمام 4 بجے ورکرز کنونشن سے خطاب بھی کریں گی۔

گزشتہ روز آصفہ بھٹو زرداری نے بلاول ہاؤس لاہور میں پی پی پی کارکنان سے ملاقات کی تھی اور اس دوران انہوں نے پارٹی کارکنان کو این اے 127 میں انتخابی مہم مزید تیز کرنے کی ہدایت کردی تھی۔

اس موقع پر آصفہ بھٹو زرداری کا کہنا تھا کہ پاکستان پیپلزپارٹی کے چیئرمین بلاول بھٹو زرداری کا 10 نکاتی ایجنڈا پاکستان کے تمام مسائل کا حل ہے، پاکستان پیپلزپارٹی کا 10 نکاتی ایجنڈا عام آدمی کو مہنگائی اور بے روزگاری سے نجات دے گا۔

انہوں نے کہا کہ پاکستان کے عوام نے شہر شہر ہونے والے جلسوں میں مثالی شرکت کرکے پیغام دے دیا ہے کہ وہ ملک میں سیاسی استحکام کے خواہش مند ہیں، پاکستان پیپلزپارٹی کو ووٹ دینا ملک میں نفرت اور تقسیم کی سیاس کو دفن کرنے کے مترادف ہوگا۔

آصفہ بھٹو زرداری کا مزید کہنا تھا کہ 8 فروری پاکستان پیپلزپارٹی کی جیت کا دن ہوگا، اس دن ترقی یافتہ اور روشن پاکستان کا حقیقی سفر شروع ہوگا۔