چیئرمین تحریک انصاف بیرسٹر گوہر علی خان نے کہا ہے کہ ہمیں عدلیہ اور ریاستی اداروں سے بہت شکوے ہیں لیکن ان پر اعتماد بھی ہے۔

تفصیلات کے مطابق گوہر علی خان نے بونیر حلقہ این اے 10 میں کارکنان سے خطاب کرتے ہوئے کہا کہ ہمارے ساتھ بہت زیادتیاں ہوئی ہیں، 175 سیاسی جماعتوں میں سب سے زیادہ بہترین انتخاب ہم نے کیا، زرداری کے ڈرائنگ روم اور مسلم لیگ نون جس نے کسی صوبے میں الیکشن نہیں کرایا اور صرف 4 بندوں کا انتخاب کروایا وہ انٹرا پارٹی الیکشن قبول ہیں، تحریک انصاف کے بھرے مجمع میں کرائے گئے انٹرا پارٹی الیکشن قبول نہیں۔

گوہر خان نے کہا کہ بلے کا نشان عمران خان کی نشانی ہے جسکو ہم دوبارہ بحال کروائیں گے، ہمیں عدلیہ اور ریاستی اداروں سے بہت شکوے ہیں لیکن ہم نے ہمیشہ عدلیہ پر اعتماد کیا، کاغذات نامزدگی جمع کرانے کے عمل کے دوران ہمارے امیدواروں کو ہر طرح سے ہراساں کیا گیا اور روکا گیا، ہم کب تک برداشت کرینگے، میری درخواست ہے کہ اب سیز فائر ہونی اور تمام جھگڑے ختم ہونے چاہئیں۔

بیرسٹر گوہر خان نے کہا کہ میری تمام کارکنان سے گزارش ہے کہ جس طرح اب تک صبر اور تحمل کا مظاہرہ کیا گیا ہے 8 فروری کو بھی اس طرح صبر و تحمل کا مظاہرہ کریں، میری درخواست ہے کہ برائے مہربانی 8 فروری کو عوام کی آواز کا راستہ نہ روکا جائے، جس نے عوام کی آواز کا راستہ روکنے کی کوشش کی اور شطرنج کی طرح حکومتیں بنائیں ملک ہمیشہ تباہی کی طرف گیا۔

ان کا کہنا تھا کہ یہ ملک مزید کسی تجربے کا متحمل نہیں ہو سکتا، عوام جو فیصلہ کریگی ہمیں منظور ہو گا، 8 فروری کو عوام متحد رہے، اپنے امیدواروں کے نشانات کو پہچانے اور انھیں کامیاب کریں۔