اسلام آباد: عام انتخابات کے پیش نظر نگران وفاقی وزراء اور سرکاری افسران کے غیر ملکی دورے منسوخ کردیے گئے ہیں۔

ذرائع کے مطابق نگران وزیر اعظم انوار الحق کاکڑ نے وزراء اور افسران کے غیر ملکی دورے منسوخ کرنے کی منظوری دے دی ہے۔

کابینہ ارکان، سرکاری افسران اور خود مختار اداروں کے حکام کے غیر ملکی دوروں کے تمام اجازت نامے منسوخ کردیے گئے ہیں۔

ذرائع کا کہنا ہے کہ انتخابی عمل کی تکمیل اور نئی حکومت کی تشکیل تک حکام اور سرکاری افسران کوئی غیر ملکی دورہ نہیں کریں گے جبکہ کابینہ ارکان سرکاری افسران اور حکام نجی غیر ملکی دورہ بھی نہیں کر سکتے۔

ذرائع نے مزید بتایا کہ نگران وزیر اعظم نے وزراء اور وفاقی سیکرٹریز کی جانب سے جاری اجازت نامے بھی منسوخ کرنے کے احکامات جاری کر دیے۔

دوسری جانب چیف الیکشن کمشنر سکندر سلطان راجہ نے ایک بار پھر اعلان کرتے ہوئے واضح کیا ہے کہ ملک بھر میں عام انتخابات 8 فروری کو ہی ہوں گے۔

انکا کہنا تھا کہ ادارے یا پولنگ اسٹاف کی کوتاہی کو برداشت نہیں کیا جائے گا، ضابطہ اخلاق کی خلاف ورزی پر بھی قانون کے مطابق سخت کارروائی عمل میں لائی جائے گی۔

چیف الیکشن کمشنر کو انتخابات کی تیاریوں کے حوالے سے بریفنگ دی گئی کہ انتخابات کے انعقاد کیلئے تمام انتظامات مکمل ہیں، ہر قسم کی صورتحال سے نمٹنے کیلئے تمام تر پیش بینی اور تیاری مکمل ہے، ملک کے کچھ حصوں میں تھریٹ الرٹس ہیں لیکن پرامن انتخابات میں کوئی کسر اٹھا نہیں رکھی جائے گی۔

بریفنگ میں مزید بتایا گیا کہ سیلاب سے متاثرہ پولنگ سٹیشنز کی مرمت کا کام تیزی سے جاری ہے، مرمت کا کام الیکشن سے قبل ہر صورت مکمل کر لیا جائے گا، تمام حساس ترین پولنگ سٹیشنز پر سی سی ٹی وی کیمروں کی تنصیب کے انتظامات بھی مکمل کر لیے گئے ہیں۔

بعدازاں  الیکشن کیلئے پاک فوج اور سول آرمڈ فورسز تعینات کرنے کی بھی منظوری دے دی گئی ہے، فوجی اور نیم فوجی دستے حساس حلقوں میں کیو آر ایف کے طور پر تعینات کیے جائیں گے۔

یاد رہے کہ الیکشن کمیشن کی جانب سے سیکیورٹی ضروریات کے پیش نظر 2 لاکھ 77 ہزار فوجی اہلکار تعینات کرنے کا مطالبہ کیا گیا تھا۔