اسلام آباد: نگران وفاقی وزیر آئی ٹی و ٹیلی کمیونیکیشن ڈاکٹر عمر سیف نے کہا ہے کہ آنے والے دنوں میں موبائل فونز کی برآمدات پر فوکس کیا جائے گا۔

نگران وزیر برائے انفارمیشن ٹیکنالوجی (آئی ٹی) عمر سیف نے پاکستان موبائل سمٹ سے خطاب کرتے ہوئے کہا کہ گزشتہ 3 سال میں پاکستان میں آئی ٹی، الیکٹرنکس کے شعبے میں کام ہوا ہے، آئی ٹی اور الیکٹرانکس کے حوالے سے پالیسیز بنی ہیں۔

انہوں نے کہا کہ موبائل پالیسی کے باعث موبائل فون پاکستان میں بننا شروع ہوئے، اب تک 57 ملین موبائل فونز پاکستان میں بن چکے ہیں، 35 برانڈز پاکستان میں موبائل فونز بنا رہے ہیں۔

عمر سیف نے کہا کہ حکومت نے موبائل مینوفیکچررز کو 3 فیصد آر اینڈ ڈی الاؤنس دینے کا فیصلہ کیا ہے، اگلے مالی سال سے پہلے یہ الاؤنس موبائل کمپنیوں کو ملنا شروع ہو جائے گا، اس الاؤنس کو 3 فیصد سے بڑھا کر 8 فیصد کیا جائیگا۔

انکا کہنا تھا کہ مقامی سطح پر فائبر کیبل کی تیاری میں بھی پیشرفت ہوئی ہے، مقامی سطح پر 4 کمپنیاں فائبر کیبل بنا رہی ہیں، اب تک 1.34 کلو میٹر فائبر مقامی سطح پر تیار کی جاچکی ہے، 300 میگا ہرٹس اسپیکٹرم نیلامی کیلئے پیش کریں گے۔

نگران وزیر آئی ٹی نے کہا کہ جولائی اگست میں فائیو جی اسپیکٹرم نیلامی کیلئے پیش کریں گے، فائیو سپیکٹرم کی نیلامی آسان شرائط پر رکھیں گے، ایسی پالیسی لائیں گے کہ کمپنیاں انفرااسٹرکچر پر سرمایہ کاری کرسکیں، ہمیں امید ہے ٹیلی کام انڈسٹری اسپیکٹرم کی نیلامی میں کھلے دل سے حصہ لے گی۔

انہوں نے کہا کہ وزارت آئی ٹی نے انفرااسٹرکچر شیئرنگ فریم ورک بنایا، وزارت آئی ٹی اسپیکٹرم شیئرنگ  فریم ورک پر کام کررہی ہے، وزارت آئی ٹی نیشنل فائبریزیشن پالیسی پر بھی کام کررہی ہے۔

عمر سیف نے کہا کہ حکومت نے کیبل بچھانے کیلئے اسٹینڈرائز کی ہے، اس اقدام سے فائبر بچھانے کی لاگت میں 300 فیصد کمی آئی ہے، حکومت کی جانب سے اسپیس پالیسی تیار کی گئی ہے، اسپیس پالیسی سے کمپنیاں پاکستانی صارفین کو کہیں بھی انٹرنیٹ دے سکیں گی۔

انہوں نے مزید کہا کہ وزارت آئی ٹی کے اقدامات سے آئی ٹی برآمدات میں 32 فیصد اضافہ ہوا ہے، اس سال کسی بھی وقت آئی ٹی برآمدات 5 ارب لاگت کی حد پار کر لیں گی، آنے والے دنوں میں موبائل فونز کی برآمدات پر فوکس کیا جائے گا۔