الیکشن کمیشن آف پاکستان نے کہا ہے کہ خیبرپختونخوا اور بلوچستان میں الیکشن ملتوی ہونے کا کوئی امکان نہیں۔

تفصیلات کے مطابق چیف الیکشن کمشنر کی زیر صدارت اہم اجلاس ہوا جس میں فیصلہ ہوا کہ سپریم کورٹ سے اب تک جو فیصلے آئے ان حلقوں کے بیلٹ پیپر چھاپے جائیں گے، اس کے بعد دوبارہ پرنٹنگ کے احکامات آئے تو کاغذ موجود نہیں ہو گا، مزید کسی حلقے کے بیلٹ پیپر دوبارہ نہیں چھپ سکیں گے، خصوصی فیچرز والا کاغد ختم ہو گیا، پرنٹنگ کارپوریشنز کی بھی استعداد کم ہے، کے پی اور بلوچستان میں الیکشن ملتوی ہونے کا کوئی امکان نہیں۔

دوسری جانب چیف الیکشن کمشنر سکندر سلطان راجہ نے صحافیوں سے غیر رسمی گفتگو کرتے ہوئے کہا کہ تمام سیاسی جماعتوں کو لیول پلیئنگ فیلڈ فراہم کی، ہم نے تفصیلی رپورٹ سپریم کورٹ میں جمع کروائی، کمیشن نے چیف سیکریٹریز اور آئی جیز کو سخت ہدایات جاری کیں، عام انتخابات کے نتائج قانون کے مطابق رات 1 بجے تک دینگے، ای ایم ایس کا استعمال شفاف الیکشن کو یقینی بنانے کیلئے ہے۔

چیف الیکشن کمشنر کا کہنا تھا کہ الیکشن کمیشن آئین کے مطابق احسن طریقے سے کردار ادا کر رہا ہے، الیکشن بروقت کرانے کیلئے تیاریاں مکمل ہیں، الیکشن کمیشن کی ذمہ داری ہے پرامن شفاف الیکشن کروائیں، موجودہ صورتحال میں بیلٹ پیپرز کی مزید پرنٹنگ کی گنجائش نہیں۔