الیکشن کمیشن آف پاکستان نے عام انتخابات ہر صورت 8 فروری کو ہی کرانے کا فیصلہ کیا ہے۔

تفصیلات کے مطابق چیف الیکشن کمشنر سکندر سلطان راجہ کی زیر صدارت الیکشن کمیشن کا اہم اجلاس ہوا جس میں واضح کیا گیا کہ 8 فروری کے انتخابات وقت پر ہوں گے۔

اجلاس میں چیف الیکشن کمشنر نے قانون نافذ کرنے والے اداروں پر مکمل اعتماد کا اظہار کیا اور سیکیورٹی اداروں کو انتخابات کے دن قانون ہاتھ میں لینے کی کوششوں سے خبردار رہنے کی تلقین کی۔

چیف الیکشن کمشنر کا اس موقع پر کہنا تھا کہ انتخابات میں رخنہ ڈالنے اور امن و امان کی صورت حال خراب کرنے والے عناصر کے ساتھ سختی سے نمٹا جائے گا، اس سلسلے میں کسی سے کوئی نرمی نہیں برتی جائے گی۔

چیف الیکشن کمشنر نے کے پی کے اور بلوچستان میں امن و امان کی بگڑتی ہوئی صورت حال پر  تشویش کا اظہار کرتے ہوئے کہا کہ دہشت گردی، سیکیورٹی کے چیلنجز اور انتخابی عمل کو متاثر کرنے والے واقعات کے باوجود الیکشن کا عمل نہیں رکے گا، الیکشن اپنے وقت پر ہوں گے اور اس حوالے سے کسی کو وہم یا گمان نہیں ہونا چاہیے۔

سکندر سلطان راجہ کا مزید کہنا تھا کہ دہشت گردی انتخابی عمل کی سب سے بڑی دشمن ہے،عام انتخابات کے پرامن انعقاد کے لیے تمام تر ضروری انتظامی و حفاظتی انتظامات لیے جائیں گے، سیاسی جماعتوں امیدواروں اور ووٹرز کو بلاخوف خطر انتخابی مہم کیلئے محفوظ اور سازگار ماحول فراہم کیا جائے گا۔

دوسری جانب چیف الیکشن کمشنر سکندر سلطان راجہ نے میڈیا سے غیر رسمی گفتگو کرتے ہوئے کہا کہ انتخابات 8 فروری کو ہی ہونگے، پورے ملک میں ہونگے، آج کے اجلاس میں سیکیورٹی انتظامات کا تفصیلی جائزہ لیا گیا، بلوچستان اور کے پی کے میں بد امنی کے واقعات کا تعلق دہشت گردی سے ہے۔

ان کا کہنا تھا کہ الیکشن 8 فروری کو ہونگے، اس میں کوئی دوسری رائے نہیں، ہمیں یقین دہانی کروائی گئی ہے کہ الیکشن پر انٹرنیٹ اور موبائل سروس دستیاب ہو گی۔