پاکستان پیپلز پارٹی کی سینیٹر پلوشہ خان نے کہا ہے کہ خدشہ ہے سانحہ ماڈل ٹاؤن جیسا سانحہ کرایا جا سکتا ہے۔

پی پی رہنما پلوشہ خان نے اسلام آباد میں پریس کانفرنس کرتے ہوئے کہا کہ 9 فروری کا سورج ن لیگ کیلئے ماتم لے کر آئے گا، سرکاری ٹی وی پر دیکھا کہ عطا تارڑ نے کھلم کھلا دھمکیاں دی ہیں، خدشہ ہے یہ جماعت اور انکا کارندہ خون خرابے کی سازش کریں گے۔

انہوں نے کہا کہ ن لیگ کو ووٹوں کی خریدوفروخت کا اچھا تجربہ ہے، ن لیگ کے اپنے لوگ گھر گھر جا کر بولتے ہیں عطا تارڑ جعلی امیدوار ہے۔

پلوشہ خان نے کہا کہ ن لیگ کا وتیرہ ہے ہر شکست سے پہلے وہ واردات ڈال دیتے ہیں، عطاتارڑ چاہتے ہیں لاہور سے بلاول بھٹو چلے جائیں، ہم کہتے ہیں آپ کسی ووٹر کو ہاتھ لگا کر دکھائیں، نہ بلاول صاحب کہیں جارہے ہیں اور نہ ہی انکے ووٹر، یہ تو آپ کا کام ہے پتلی گلی سے نکل جانا، آپکی جماعت کو جو توانائی کے انجکشن ملے وہ زرداری صاحب نے دیے۔

انکا کہنا ہے کہ عطا تارڑ صاحب اپنا غصہ ہماری جماعت پر نہ نکالیں، انکی اپنی جماعت کے لوگ انکے خلاف ہیں، ن لیگ سے مطالبہ ہے وہ اپنی پوزیشن واضح کرے۔

پلوشہ خان نے مزید کہا کہ خدشہ ہے سانحہ ماڈل ٹاؤن جیسا سانحہ کرایا جا سکتا ہے، الیکشن کمیشن سے مطالبہ کرتے ہیں عطا تارڑ کے بیان کا نوٹس لے۔