الیکشن 2024 میں انٹرنیٹ کی بندش کے حوالے سے پاکستان ٹیلی کمیونیکیشن (پی ٹی اے) نے وضاحت کردی ہے۔

پی ٹی اے کی جانب سے جاری بیان میں بتایا گیا ہے کہ عام انتخابات میں حکومت پاکستان الیکشن کے دن انٹرنیٹ بند نہیں کرے گی۔

پاکستان ٹیلی کمیونیکیشن نے اس بات کی تصدیق کی ہے کہ انتخابات کے دن انٹرنیٹ کی سہولت صارفین کو میسر ہو گی۔

پی ٹی اے کا کہنا ہے کہ پولنگ ڈے پر ملک بھر میں انٹرنیٹ بغیر کسی رکاوٹ کے کام کرے گا۔

واضح رہے کہ عام انتخابات میں صرف 24 گھنٹے باقی رہ گئے ہیں، تاہم جس کے پیش نظر الیکشن کمیشن آف پاکستان نے پولنگ کے تمام انتظامات مکمل کرلئے ہیں۔

پاکستان میں قومی اسمبلی اور چاروں صوبائی اسمبلیوں کے عام انتخابات کل ہوں گے، چاروں صوبوں میں 90 ہزار 675 پولنگ اسٹیشنز قائم کیے گئے ہیں۔

قومی اسمبلی کی نشستوں پر کل پانچ ہزار ایک سو اکیس امیدوار میدان میں ہیں اور چاروں صوبائی اسمبلیوں کے لیے 12695 امیدوار میدان میں ہیں جبکہ ملک میں کل 128,585,760 رجسٹرڈ ووٹرز ہیں۔

پولنگ کا وقت

کل 8 فروری کو پولنگ کا عمل صبح 8 سے شام 5 بجے تک جاری رہے گا، پولنگ کے انتظامات مکمل کر لیے گئے ہیں۔

پولنگ ڈے پر انتخابی مہم یا ووٹرز کی حوصلہ افزائی یا حوصلہ شکنی کرنے کی اجازت نہیں ہو گی، انتخابی عمل تک میڈیا پر ہر قسم کے پول سروے پر بھی پابندی ہو گی، میڈیا پولنگ ختم ہونے کے ایک گھنٹے بعد رزلٹ نشر کرسکے گا۔

واضح طور پر بتانا ہوگا کہ نتائج غیر حتمی اور غیر سرکاری ہیں، آر اوز پولنگ اسٹیشنوں کا مکمل غیر حتمی نتیجہ جاری کریں گے، ڈسٹرکٹ اینڈ ریٹرنگ افسران و پولیس ضابطہ اخلاق پر عملدرآمد کی پابند ہے، ضابطہ اخلاق کی خلاف ورزی غیر قانونی تصور ہو گی۔