فیس بک کے چیف ایگزیکٹیو آفیسر اور اس کی پیرنٹ کمپنی میٹا کے مالک مارک زکربرگ نے کہا ہے کہ کسی بھی انسان کے لیے اس کی فیملی سے بڑھ کر کچھ بھی نہیں ہوتا۔

حال ہی میں مارک زکربرگ نے ایک فورم پر خطاب کرتے ہوئے بتایا کہ رات بھر کی بھرپور نیند لینے کے بعد صبح 8 بجے جاگنے پر وہ سب سے پہلے تو سوشل میڈیا پلیٹ فارمز پر اپ ڈیٹس چیک کرتے ہیں۔

انہوں نے کہا کہ اس معمول سے فارغ ہو کر وہ مارشل آرٹ کی تھوڑی سی مشق کرتے ہیں، اس سے قبل وہ روزانہ کچھ دیر جاگنگ کرتے تھے، اب وہ گھر کی حدود ہی میں مارشل آرٹ کی مشق کو ترجیح دیتے ہیں۔

ان کا کہنا تھا کہ مارشل آرٹ کی مشق سے فارغ ہو کر وہ کچھ دیر فیملی کے ساتھ گپ شپ لگاتے ہیں، ہلکے پھلکے ناشتے کے دوران وہ اپنی تینوں بیٹیوں کے ساتھ باتیں کرتے ہیں، ایک یا دو گیت سنتے ہیں اور پھر ان کی تعلیم سے متعلق کچھ گفتگو کے بعد دفتر جانے کی تیاری کرتے ہیں۔

میٹا کے مالک نے بتایا کہ کسی بھی انسان کو اپنی زندگی کے حوالے سے سنجیدہ ہونا ہی چاہیے، اُسے طے کرنا چاہیے کہ زندگی بھر کیا کرنا ہے اور یومیہ معمولات کی حدود میں رہتے ہوئے کیا کرنا ہے۔

مارک زکربرگ نے کہا کہ زندگی جیسی نعمت کو فضول سرگرمیوں میں ضائع کرنے کے بجائے معاملات کو خوش اسلوبی سے نپٹانے کی کوشش کرنی چاہیے، اِسی صورت زندگی میں توازن پیدا ہوتا ہے۔

انہوں نے کہا کہ کسی بھی انسان کے لیے اس کی فیملی سے بڑھ کر کچھ بھی نہیں ہوتا، توجہ دوسروں کو بھی ملنی ہی چاہیے مگر سب سے زیادہ توجہ فیملی کو دی جانی چاہیے۔