صحت مند رہنے کے لیے متوازن غذا، جسمانی سرگرمی اور نیند بے حد ضروری ہے تاہم ایسی تمام خواتین جو اپنی نیند میں کوتاہی سے کام لیتی ہیں ان میں امراض قلب کا خطرہ 75 فیصد تک بڑھ سکتا ہے تاہم محض نیند کو بہتر بناکر یہ خواتین اس موذی مرض سے محفوظ رہ سکتی ہیں۔

امریکن ہارٹ ایسوسی ایشن کے جریدے سرکولیشن میں شائع ہونے والی ایک نئی اور طویل دورانیے کی تحقیق کے مطابق، درمیانی عمر کی ایسی خواتین جو ہر رات پانچ گھنٹے سے کم سوتی ہیں ان میں امراض قلب کا خطرہ ڈرامائی طور پر بڑھ جاتا ہے۔

یونیورسٹی آف پٹسبرگ کے محققین نے ایک تحقیق کی جس میں 22 سال کے دوران 42 سے 52 سال کی تقریباً 3000 خواتین میں ان کی نیند کی عادات اور دل کی صحت کا جائزہ لیا۔

خواتین کی اکثریت یعنی  55 فیصد کا کہنا تھا کہ وہ ہر رات تقریباً چھ گھنٹے اور 30 ​​منٹ سوتی ہیں،  جبکہ 14 فیصد نے بتایا کہ وہ مستقل بنیادوں پر پانچ گھنٹے سے کم نیند لیتی ہیں۔

اس تحقیق کے نتایج کافی پریشان کن تھے ان نتائج کے  مطابق جو خواتین فی رات اوسطاً پانچ گھنٹے سے کم سوتی ہیں ان میں فالج، ہارٹ اٹیک، ہارٹ فیلیئر اور دل کی شریانوں کے مرض میں مبتلا ہونے کا امکان ان خواتین کے مقابلے میں 72 فیصد زیادہ ہوتا ہے جو ہر رات چھ گھنٹے سے زیادہ سوتی ہیں۔

ایسی خواتین کے لیے صحت کے مسائل اور بھی زیادہ تھے  جو ہفتے میں تین بار سے زیادہ بے خوابی کا سامنا کرتی ہیں اور رات میں اوسطاً پانچ گھنٹے سے کم سوتی تھیں، ان میں امراض قلب  میں مبتلا ہونے کا امکانات 75 فیصد زیادہ پایا گیا۔

ماہرین کے مطابق نیند اور امراض قلب کے درمیان تعلق کی ایک وجہ یہ ہوسکتی ہے کہ  نیند کی کمی سے بلڈ پریشر اور انسولین کے خلاف مزاحمت بڑھ جاتی ہے جس سے خون کی شریانوں کو نقصان پہنچنے کا خطرہ بھی موجود رہتا ہے۔ اسی طرح  نیند کی کمی سے خواتین میں موٹاپے کا خطرہ بھی جنم لینے لگتا ہے اور موٹاپا امراض قلب  کے مسائل کا باعث بن سکتا ہے۔

یہی وجہ ہے ماہرین تمام بالغ افراد کو رات میں کم از کم سات گھنٹے سے آٹھ گھنٹے سو نے کا مشورہ دیتے ہی تاکہ امراض قلب کے ساتھ دیگر بیماریوں سے بھی محفوط رہ سکیں۔