عالمی عدالت انصاف میں فلسطین پر اسرائیلی قبضے کے خلاف کیس کی سماعت ہوئی جس میں پاکستان نے اپنا موقف پیش کردیا۔

نگران وزیر قانون احمد عرفان اسلم نے عالمی عدالت انصاف میں فلسطین پر اسرائیلی قبضے کے کیس کی سماعت میں پاکستان کا مؤقف پیش کیا ہے۔

نگران وزیر قانون احمد عرفان اسلم کا کہنا ہے کہ پاکستان نے ہمیشہ فلسطینیوں کے حقوق کا دفاع کیا ہے، عدالت فلسطینیوں کے حق کو تسلیم کرچکی ہے۔

انہوں نے کہا کہ آزادی ہر انسان کا بنیادی حق ہے، پاکستان نے ہمیشہ فلسطینیوں کے حقوق کا دفاع کیا ہے۔ پاکستان فلسطینیوں کے حق خودارادیت کا حامی ہے۔

ان کا کہنا تھا کہ پاکستان نے ہمیشہ اسرئیل کے غاصبانہ قبضے کے معاملے کو اٹھایا ہے، اسرائیل فلسطین میں نسل کشی غیرقانونی آباد کاری کررہا ہے۔

نگراں وزیر قانون کہتے ہیں کہ تمام ممالک قانونی طریقے سے اسرائیل کی ناانصافیوں کو مسترد کرتے ہیں جب کہ اسرائیل کے غاصبانہ قبضے کی اقوام متحدہ نے بھی مذمت کی ہے۔

احمد عرفان اسلم کا مزید کہنا تھا کہ اسرائیل فوری فلسطین سے اپنی فوج نکالے جب کہ اسرائیلی مظالم کے خلاف آئی سی جے میں کارروائیاں امید کی کرن ہیں۔

واضح رہے کہ عالمی عدالت انصاف میں 52 ممالک اور انسانی حقوق کی 3 تنظیموں کے نمائندے موجود ہیں جب کہ عالمی عدالت انصاف 19 سے 26 فروری تک دی ہیگ کے پیس پیلس میں عوامی سماعتوں کا انعقاد جاری رکھے گی۔