کراچی: پاکستان پیپلزپارٹی کے چیئرمین بلاول بھٹو زرداری کا کہنا ہے کہ الیکشن کے دوران جو کچھ ہوا وہ افسوسناک ہے۔

پاکستان پیپلزپارٹی کے چیئرمین بلاول بھٹو زرداری کہتے ہیں کہ الیکشن میں ہمارے کارکنوں پر تشدد کیا گیا اور الیکشن کے دوران ہمارے کارکن شہید ہوئے، پی پی کارکنوں پر تشدد کی مذمت کرتے ہیں۔

بلاول بھٹو کا کہنا تھا کہ شہید عبدالرحمان کے گھر تعزیت کے لیے آیا ہوں، جو بھی اس حملے میں ملوث تھے ان کو پکڑیں گے، مراد علی شاہ کو واقعے کی تحقیقات کرنے کی ہدایت کی ہے۔

انہوں نے کہا کہ جھوٹے الزامات لگا کر پی پی کو بلیک میل نہیں کیا جاسکتا، کسی کے ڈراموں سے بلیک میل نہیں ہوں گے اور جو کارکنوں پر حملوں میں ملوث ہیں ان کے خلاف کارروائی ہوگی۔

پیپلزپارٹی کے چیئرمین کہتے ہیں کہ جوجماعتیں سمجھتی ہیں تشدد کی سیاست کرسکتی ہیں تویہ ان کی بھول ہے، فائرنگ کرنے والوں کے خلاف جے آئی ٹی تشکیل دیں گے اور کارکنوں پر تشدد کرنے والوں کو عبرت کا نشان بنائیں گے۔

بلاول بھٹو نے مطالبہ کیا کہ پیپلزپارٹی اپنے کارکنوں کے لیے انصاف مانگ رہی ہے۔ کراچی میں لسانی، فرقہ وارانہ دہشت گردی برداشت نہیں کریں گے جب کہ قاتلوں کی گرفتاری کے بجائے الٹا ہم پر الزامات لگائے گئے۔

ان کا کہنا تھا کہ عبدالرحمان نے ایم کیوایم کا پرچم اتارا، کسی جماعت کا پرچم اتارنا پیپلزپارٹی کی سیاست نہیں، شہید عبدالرحمان کے اہلخانہ کے خلاف ہی مقدمہ درج کیا گیا۔

انہوں نے سوال کیا کہ ہمارے کارکن نے پرچم نیچے کیا توکیا گولی چلانا جائز ہے؟ امید ہے نئی حکومت اور عدالتوں سے انصاف ضرور ملے گا۔

بلاول بھٹو کا مزید کہنا تھا کہ پیپلزپارٹی اعتراضات پر قانونی طریقے سے کارروائی کرے گی، جو جماعتیں دھاندلی کے بغیرجیت نہیں سکتیں وہ احتجاج کررہی ہیں۔