چیئرمین پاکستان سی این جی ایسوسی ایشن غیاث پراچہ کا کہنا ہے کہ ایل این جی کی درآمد بڑھانے سے ملک میں بجلی اورگیس کی قیمتیں کم ہو جائیں گی ۔

تفصیلات کے مطابق چیئرمین پاکستان سی این جی ایسوسی ایشن غیاث پراچہ کا کہنا ہے کہ   عالمی منڈی میں ایل این جی سستی ہوگئی ہے، مقامی گیس کی پیداوار عارضی بندکرکے ایل این جی درآمد کرکے اربوں ڈالر کا فائدہ لیاجائے۔

غیاث پراچہ  نے حکومت سے  مطالبہ کیا کہ  سی این جی سیکٹر مشکلات کا شکار ہے،اسے بیل آؤٹ پیکج دیاجائے اور ایل این جی کی درآمد پر کسٹم ڈیوٹی ختم کر کے اس کا استعمال بڑھایا جائے۔

انہوں نے کہا کہ ایل این جی کی درآمد بڑھانے سے ملک میں بجلی اورگیس کی قیمتیں کم ہو جائیں گی ۔ حکومت کو گیس پر اربوں روپے کی سبسڈی بھی نہیں دینی پڑے گی۔

چیئرمین پاکستان سی این جی ایسوسی ایشن کا کہنا  ہے کہ ایل این جی کی درآمد بڑھنے سے بند کارخانے  بھی چلنے  لگیں گے جس سے ملکی پیداوار بڑھ جائے گی اور لاکھوں افراد کو روزگار ملے گا۔

غیاث پراچہ نے کہا کہ  سی این جی سیکٹر میں کئی سو ارب روپے کی سرمایہ کاری ہو چکی ہے مگر سی این جی کی فروخت تقریباً ختم ہو گئی ہے۔ سی این جی مالکان کرائے اور اسٹاف کی تنخواہیں ادا کرنے کی پوزیشن میں نہیں رہے۔

انہوں نے مطالبہ کیا کہ سی این جی پر عائد ٹیکس کو کم کیا جائے اور اسے زندہ رہنے کے لئے امدادی پیکج  دیا جائے ۔