ہیٹی میں مسلح افراد نے مرکزی جیل پر دھاوا بول دیا، جس کے بعد 4 ہزار کے قریب قیدی جیل سے فرار ہونے میں کامیاب ہو گئے۔

برطانوی خبر رساں ادارے کی خبر کے مطابق ہیٹی کے دارالحکومت پورٹ او پرنس کی مرکزی جیل پر مسلح گروہوں نے دھاوا بول دیا ہے اور متعدد قیدیوں کو رہا کرا لیا گیا ہے۔

ایک مقامی صحافی نے برطانوی خبر رساں ادارے کو بتایا کہ وہاں قید تقریبا چار ہزار افراد میں سے زیادہ تر اب فرار ہو چکے ہیں۔

فرار ہونے قیدیوں میں گینگ کے وہ ارکان بھی شامل ہیں جنہیں 2021 میں صدر جووینل موئس کے قتل کے الزامات میں جیل میں رکھا گیا تھا۔

امریکہ کے غریب ترین ملک ہیٹی میں حالیہ برسوں میں تشدد میں مزید اضافہ ہوا ہے۔ پورٹ او پرنس کے 80 فیصد حصے پر وزیر اعظم ایریل ہنری کو ہٹانے کا ارادہ رکھنے والے گروہوں کا کنٹرول ہے۔

تشدد میں تازہ ترین اضافہ جمعرات کو اس وقت شروع ہوا جب وزیر اعظم نے ہیٹی میں کینیا کی قیادت میں ملٹی نیشنل سکیورٹی فورس بھیجنے پر تبادلہ خیال کرنے کے لیے نیروبی کا دورہ کیا۔

جمعے کے روز کینیا کے صدر ولیم روٹو نے کہا تھا کہ انہوں نے اور ہنری نے ایک معاہدے پر دستخط کیے ہیں اور وہ تعیناتی میں تیزی لانے کے لیے کام کر رہے ہیں۔