خواتین گھر ہو یا باورچی خانہ صفائی کا خاص خیال رکھتی ہیں تاہم باورچی خانے کے چند مقامات ایسے ہیں جہاں کی صفائی اکثر نظر انداز کر دی جاتی ہے اور یہی جگہ جراثیم کا گڑھ بن جاتی ہیں جہاں سے یہ جراثیم کھانے میں منتقل ہوکر آپ کو بیمار کر سکتے ہیں۔

 یہاں باورچی خانے میں سب سے زیادہ گندی جگہوں کے بارے میں بتایا جارہا ہے اور ساتھ ہی اس کی صفائی کا طریقہ بھی پیش کیا جارہا ہے۔

ریفریجریٹر میں گوشت اور سبزیوں کے ڈبے

غذا کو جراثیم سے بچانے کے لیے ضروری ہے کہ ریفریجریٹر کی صفائی کو یقینی بنایا جائے۔ نیشنل سینی ٹیشن فاؤنڈیشن کی ایک تحقیق کے مطابق، ریفریجریٹر میں موجود سبزیوں اور گوشت کے درازوں میں سالمونیلا، لیسٹیریا، ای کولی، خمیر اور مولڈ جیسے جراثیم پیدا ہوسکتے ہیں۔

یہی وجہ ہے کہ ماہرین گوشت، مرغی اور مچھلی کو ایک علیحدہ شیلف میں رکھنے کا مشورہ دیتے ہیں تاکہ دوسری غذاؤں کو جراثیم سے محفوظ رکھا جاسکے۔

سبزیوں اور گوشت کے ڈبوں کو صاف کرنے کے لیے سب سے پہلے درازوں کو ہٹا دیں اور پھر ہر ایک دراز کو صاف کپڑے یا اسفنج سے ہلکے صابن اور گرم پانی سے دھوئیں اور وقتاً فوقتاً انہیں صاف کرتے ہیں۔

سنک

باورچی خانے کے سب سے جراثیم زدہ جگہوں میں سے ایک سنک ہے کیونکہ اس میں پکے ہوئے کھانے کے علاوہ کچے گوشت کے اجزاء بھی موجود ہوتے ہیں جبکہ چکنائی کی بھی ایک تہہ سی جم جاتی ہے اگر اس کی صفائی کا خیال نہ رکھا جائے تو ایسی صورت میں جراثیم پنپنے لگتے ہیں جو  کھانسی، نزلہ اور یہاں تک کہ کان میں انفیکشن کا سبب بن سکتے ہیں۔

سنک کے لائن سے بو آنا اور بھی خطرناک ہوسکتا ہے جس کے نتیجے میں لیسٹیریا، سالمونیلا، ای کولی، ایم آر ایس اے اور لیجیونیئرز کے انفیکشن جنم لے سکتے ہیں۔

برتن دھونے والے اسفنج اور صفائی کے برش

ہر کھانے کے بعد برتنوں کو دھونا عام رجحان ہے تاہم کبھی آپ نے برتن دھونے والے اسفنج اور صفائی کے برش کو بھی دھوکر صاف کیا ہے؟

سائنٹیفک رپورٹس میں شائع ہونے والی ایک تحقیق کے مطابق، آپ کے کچن کے اسفنج میں بیت الخلا کے اندر جتنے بیکٹیریا ہو سکتے ہیں۔

ڈریکسل یونیورسٹی کی ایک مائیکرو بایولوجسٹ جینیفر کوئنلان ان اسفنجوں کو صاف رکھنے چند طریقے پیش کرتے ہیں جس کے مطابق ان اسفنج کو کچے گوشت سے دور رکھیں، ہر دو ہفتے بعد اسفنج کو تبدیل کریں اور ہر چند دن بعد ان اسفنج کو گرم پانی میں ڈال کر صاف کریں۔

مصالحوں کے جار

جرنل آف فوڈ پروٹیکشن میں شائع ہونے والی ایک تحقیق کے مطابق مصالحوں کے جار بھی جراثیم سے بھر پور ہوتے ہیں۔

اس کی وجہ یہ ہے کہ لوگ آلودہ درازوں میں رکھے ہوئے کچے گوشت یا سبزیوں کو ہاتھ لگانے کے بعد ان جار کو پکڑ لیتے ہیں اور بعض اوقات لوگوں کی بڑی تعداد ہاتھوں کو دھوئے بغیر جار سے خشک مصالحوں کو پکے ہوئے کھانوں میں شامل کرلیتی ہے اس طرح بیمار ہونے کا خطرہ بڑھ جاتاہے۔

ماہرین کا کہنا ہے کہ ان ڈبوں کو گرم پانی سے صاف کرتے رہیں اور کچے گوشت کو دھونے کے بعد ان کو ہاتھ لگانے سے گریز کریں۔

دروازے کے ہینڈل اور نوبس

لوگ اکثر کچن کے ہینڈل اور نوبس کو اپنے گندے ہاتھوں سے چھوتے ہیں اس طرح کئی خطرناک بیکٹیریا جیسے لیسٹیریا، سالمونیلا، اسٹیفیلوکوکس اور نورو وائرس کا خطرہ بڑھ جاتا ہے یہی وجہ ہے کہ ماہرین نے انہیں بھی گرم پانی سے صاف کرنے کا مشورہ دیتے ہیں۔