شمالی وزیرستان کے علاقے میرعلی میں دہشت گردوں کے سیکیورٹی چیک پوسٹ پر حملے کے نتیجے میں لیفٹیننٹ کرنل اور کیپٹن سمیت 7 جوانوں نے جام شہادت نوش کیا۔

پاک فوج کے شعبہ برائے تعلقاتِ عامہ آئی ایس پی آر کے مطابق 6 دہشتگردوں نے میر علی میں سیکورٹی فورسز کو نشانہ بنایا، سیکیورٹی فورسز نے دہشت گردوں کا ابتدائی حملہ ناکام بنایا۔

آئی ایس پی آر کے مطابق ابتدائی حملہ ناکام ہونے کے بعد دہشت گردوں نے اسلحے سے لدی ہوئی گاڑی چوکی سے ٹکرا دی۔ چوکی سے گاڑی ٹکرانے کے بعد متعدد خودکش دھماکے کیے گئے۔ خود کش حملوں کے نتیجے میں چوکی کی عمارت کا ایک حصہ منہدم ہو گیا۔

آئی ایس پی آر کی جانب سے جاری بیان کے مطابق دہشت گردوں سے فائرنگ کے شدید تبادلے کے نتیجے میں لیفٹیننٹ کرنل کاشف اور کیپٹن احمد بدرسمیت سات جوان شہید ہوگئے، جوابی کارروائی میں 6 دہشت گردوں کو جہنم واصل کیا گیا۔

آئی ایس پی آرکا کہنا ہے کہ شہدامیں خیبرسےتعلق رکھنےوالےحوالدارصابرلکی مروت کےنائک خورشید، ضلع پشاورکےسپاہی ناصراورکوہاٹ کےسپاہی راجہ نے بھی جام شہادت نوش کیا۔ ایبٹ آبادکےسپاہی سجادبھی دہشتگردوں کےحملےمیں شہیدہوئے۔

آئی ایس پی آر کے مطابق شہدا میں 39 سالہ لیفٹیننٹ کرنل سید کاشف علی کا تعلق کراچی سے تھا، 23 سالہ شہید کیپٹن محمد احمد بدر کا تعلق تلہ گنگ سے تھا۔ میرعلی میں سینیٹائزیشن آپریشن جاری ہے۔

آئی ایس پی آر کی جانب سے کہا گیا کہ پاکستان کی سیکیورٹی فورسز وطن عزیزسے دہشت گردی کی لعنت کے خاتمے کے لئے پرعزم ہیں، بہادر سپاہیوں کی عظیم قربانیاں دہشت گردی کے خلاف عزم کو تقویت بخشتی ہیں۔