ورلڈ ہیلتھ آرگنائزیشن کے مطابق غزہ میں 7 اکتوبر سے جاری اسرائیلی جارحیت کے نتیجے میں اب تک 685 ہیلتھ ورکرز شہید ہوچکے ہیں۔

غیر ملکی خبر رساں ادارے کے مطابق ورلڈ ہیلتھ آرگنائزیشن نے غزہ میں ہیلتھ ورکرز پر اسرائیلی حملوں کے حوالے سے رپورٹ جاری کردی ہے۔

ورلڈ ہیلتھ آرگنائزیشن کا کہنا ہے کہ غزہ میں 7 اکتوبر سے اب تک ہیلتھ ورکرز پر 410 حملے کیے گئے جس کے نتیجے میں 685 ورکرز شہید ہوئے۔

ورلڈ ہیلتھ آرگنائزیشن کے مطابق اسرائیلی حملوں میں 99 تنصیبات کو نقصان پہنچا اور 104 ایمبولینسس متاثر ہوئیں جبکہ 902 افلسطینی زخمی ہوئے۔

خیال رہے کہ غزہ پر اسرائیلی بربریت تاحال جاری ہے، گزشتہ  24 گھنٹے میں 93 فلسطینی شہید جب کہ 142 زخمی ہوگئے۔

اسرائیلی فوج کا الشفاء اسپتال پر حملے میں پولیس سربراہ سمیت 90 فلسطینی شہید ہوگئے جب کہ متعدد زخمی ہیں، غزہ میں امداد تقسیم کرنے والی ٹیم پر بھی اسرائیلی نےبمباری کی جس میں 23 فلسطینی شہید اور متعدد زخمی ہوگئے۔

دوسری جانب صہیونی فورسز کی وسطی غزہ میں نصیرات پناہ گزین کیمپ پر فضائی حملے میں شہید ہونے والوں کی تعداد 27 ہوگئی ہے۔

واضح رہے کہ غزہ پر اسرائیلی حملوں میں 31 ہزار 819 فلسطینی شہید اور 73 ہزار 934 زخمی ہوچکے ہیں۔