ایف ایس بی سیکیورٹی سروس کا کہنا ہے کہ ‘چاروں دہشت گردوں’ کو یوکرین کی سرحد کی جانب جاتے ہوئے گرفتار کیا گیا تھا۔

تفصیلات کے مطابق روس نے ماسکو کے قریب ایک کنسرٹ ہال میں فائرنگ کے الزام میں 11 افراد کو گرفتار کرلیا ہے جن میں 4 مشتبہ مسلح افراد بھی شامل ہیں۔

داعش نے جمعے کے روز ہونے والے اس حملے کی ذمہ داری قبول کی ہے، جو گزشتہ 20 سالوں میں روس میں ہونے والا سب سے مہلک حملہ ہے۔

اس بات کے اشارے ملے ہیں کہ روس یوکرین کے ساتھ روابط کی پیروی کر رہا ہے، اس کے باوجود کہ یوکرین کے صدارتی مشیر میخیلو پوڈولیاک نے کہا تھا کہ کیف کا اس سے کوئی لینا دینا نہیں ہے۔

ایف ایس بی سیکیورٹی سروس کا کہنا ہے کہ چاروں دہشت گردوں کو یوکرین کی سرحد کی جانب جاتے ہوئے گرفتار کیا گیا تھا اور ان کے یوکرین میں رابطے تھے۔ ان کا کہنا تھا کہ انہیں ماسکو منتقل کیا جا رہا ہے۔

یوکرین کی وزارت خارجہ کی ترجمان ماریا زخارووا نے ٹیلی گرام پر کہا کہ اب ہم جانتے ہیں کہ یہ خونی بدمعاش کس ملک میں چھپنے کا ارادہ رکھتے تھے۔

ایک سینئر روسی قانون ساز آندرے کارتاپولوف نے کہا کہ اگر یوکرین ملوث ہے تو روس کو میدان جنگ میں قابل احترام، واضح اور ٹھوس جواب دینا ہوگا۔

قبل ازیں روس کی تحقیقاتی کمیٹی نے کہا تھا کہ دارالحکومت کے قریب کروکس سٹی ہال میں کنسرٹ میں شرکت کرنے والوں پر نقاب پوش مسلح افراد نے خودکار ہتھیاروں سے فائرنگ کی تھی جس میں کم از کم 115 افراد ہلاک ہوئے تھے۔