ایف آئی اے اینٹی کرپشن سرکل اسلام آباد نے جعلی اور غیر رجسٹرڈ ادویات کے خلاف بڑی کارروائی کی ہے۔

تفصیلات کے مطابق ایف آئی اے اینٹی کرپشن سرکل اسلام آباد کا جعلی اور غیر رجسٹرڈ ادویات کی فروخت میں ملوث عناصر کے خلاف کریک ڈاون میں بھاری مقدار میں جعلی اور غیر رجسٹرڈ ادویات برآمد کی گئی ہیں۔

ایف آئی اے کے مطابق ڈپلومیٹک انکلیو اسلام آباد میں واقع عیسی جی نامی میڈیکل سٹور میں چھاپہ مار کارروائی کی گئی، چھاپے کے دوران جعلی اور غیر رجسٹرڈ ادویات برآمد ہوئیں۔

ایف آئی اے اینٹی کرپشن سرکل اسلام آباد کی چھاپہ مار کارروائی میں ڈریپ حکام بھی شامل تھے۔

جعلی اور غیر رجسٹرڈ ادویات کو ڈریپ حکام کی موجودگی میں قبضے میں لے لیا گیا۔

ایف آئی اے کے مطابق غیر رجسٹرڈ ادویات بلیک مارکیٹ میں مہنگے داموں فروخت کی جارہی تھیں، مذکورہ ادویات کو ڈریپ حکام کے حوالے کر دیا گیا۔

ملزمان کے خلاف انکوائری درج کر کے تحقیقات کا آغاز کر دیا گیا۔

ڈریپ حکام کی رپورٹ کی روشنی میں ملزمان کے خلاف مزید قانونی کاروائی عمل میں لائی جائی گی۔

ایف آئی اے اینٹی کرپشن کے ترجمان کا کہنا ہے کہ جعلی اور غیر رجسٹرڈ ادویات میں ملوث عناصر کے خلاف سخت کاروائیوں کا آغاز کر دیا گیا ہے

ملزمان کی گرفتاری کے لئے خصوصی چھاپہ مار ٹیمیں تشکیل دے دی گئی ہیں۔

چھاپہ مار ٹیمیں ڈرگ ریگولیٹری اتھارٹی آف پاکستان کے ساتھ مشترکہ کاروائیاں کر رہی ہیں، کسی شخص کو بھی معصوم لوگوں کی زندگیوں سے کھیلنے کی اجازت نہیں ہے