سعودی عرب کے شہر ریاض میں وزیر اعظم شہباز شریف سے سعودی وفد نے ملاقات کی۔

تفصیلات کے مطابق سعودی عرب کے شہر ریاض میں وزیر اعظم شہباز شریف سے جنرل سیکریٹری سعودی پاکستان سپریم کوآرڈی نیشن کونسل کی سربراہی میں وفد نے ملاقات کی۔

ملاقات میں باہمی دلچسپی کےامورپرتفصیلی بات چیت کی گئی اور سعودی وزیرخارجہ کے دورہ پاکستان کے دوران سعودی سرمایہ کاری پر پیشرفت کا جائزہ لیا گیا۔

مشیرشاہی درباراور وفد کی جانب سے پاکستان میں سعودی سرمایہ کاری کے لیے گہری دلچسپی کا اظہار کیا گیا۔

اس موقع پر آل تویجری نے کہا کہ جنگی بنیادوں پر پاکستان میں سرمایہ کاری پر کام شروع کر دیا ہے۔

ملاقات میں وزیراعظم کو سعودی حکومت کے اصلاحات کے ایجنڈے پر بھی تفصیلی بریفنگ دی گئی۔

وزیر اعظم شہباز شریف نے کہا کہ پاکستان اورسعودی عرب کےدیرینہ برادرانہ تعلقات مزید مضبوط ہو رہے ہیں، پاکستان اورسعودی عرب کے معاشی تعلقات ایک نئے دور میں داخل ہو چکے ہیں۔

وزیر اعظم نے کہا کہ سعودی وفد کے دورہ پاکستان کے دوران پیشرفت پر برق رفتاری سے آگے بڑھ رہے ہیں، پاکستانی عوام خادم الحرمین الشریفین کے لیےعزت واحترام کے جذبات رکھتے ہیں۔

وزیراعظم شہباز شریف نے پرتپاک استقبال اور شاندار میزبانی پر سعودی ولی عہد اور سعودی وزیراعظم کا شکریہ ادا کیا۔

ملاقات میں وزیرخارجہ،وزیرخزانہ،وزیرپٹرولیم اور وزیراطلاعات نے شرکت کی جبکہ وزیر توانائی، وزیرتجارت اور ڈپٹی چیئرمین پلاننگ کمیشن بھی ملاقات میں شریک تھے۔