دنیا میں جتنے بھی عجیب و غریب فیشن پروان چڑھتے ہیں ان میں اکثریت کا تعلق چین سے ہوتا ہے ایسا ہی ایک انوکھا فیشن چین میں اپنے عروج پر ہے جس میں وہ اپنے کانوں کو سر سے قدرے باہر کرنے کے لیے مختلف چیزوں کا استعمال کر رہے ہیں۔

واضح رہے کہ دنیا بھر میں موجود بہت سی ثقافتوں میں کھڑے ہونے کان کو ایک جسمانی عیب تصورکیا جاتا ہے۔ تاہم اس کے برعکس چین میں ایلف کی طرح کے کان کا جنون بڑھتا جارہا ہے۔

چین میں اس طرح کے کان بنانے کا رجحان پہلے سے ہی تھا تاہم اسے دنیا بھر توجہ اس وقت حاصل ہوئی جب 2021 میں یہ چینی سوشل میڈیا پر ایک ٹرینڈنگ ٹاپک بننے کے بعد اسے دنیا کے سب سے بڑے نیوز آؤٹ لیٹس نے کور کیا۔

واضح رہے کہ ایک چینی سوشل میڈیا انفلوئنسر چن جیانن نے ٹوئٹر پر اپنی تصاویر شیئر کی جس میں کان کو باہر کرنے سے پہلے اور بعد کی تصاویر میں چہرے پر آنے والا فرق خاصا نمایاں تھا۔

چن کا خیال تھا کہ اس معمولی سی تبدیلی نے ان کے چہرے کو پتلا اور جوان بنا دیا ہے، اور چینی کاسمیٹک کلینکس کی تعداد کو دیکھتے ہوئے جو ‘ایلف ایئر’ بنانے کے اپنی خدمات پیش کر رہے ہیں، تو وہ اس طرح کے کان کی خواہش رکھنے والی اکیلی نہیں ہیں بلکہ ایک بڑی تعداد سرجری کرانے اور سر سے باہر پھیلے ہوئے کان حاصل کرنے کے لیے بڑی رقم ادا کرنے کو تیار ہیں۔

واضح رہے کہ ایلف اسی کی دہائی میں پیش کیا جانے والا ایک امریکی ٹی وی سٹ کام تھا جس میں ایلف نامی کردار اپنی ہلکی پھلکی باتوں اور شرارتوں سے سب کو محظوظ کرتا تھا۔ اس کردار کے کان کافی بڑے اور سر سے باہر نکلے ہوئےتھے۔

ایلف کی طرح کے کان بنانے کے لیے ضروری نہیں کہ صرف سرجری ہی کرائی جائے بلکہ اسے حاصل کرنے کے ایک سے زیادہ طریقے ہیں۔ ان میں سب سے کم تکلیف دہ ہائیلورونک ایسڈ کا انجیکشن ہے جسے کان کی لو کے پیچھے لگا جاتا ہے جس سے وہ ایک طرف کھڑے ہوجاتے ہیں تاہم یہ عارضی طریقہ ہے، کیونکہ جیسے ہی انجیکشن کا اثر ختم ہوتا ہے تو کان اپنی اصل پوزیشن پر واپس آجاتے ہیں۔ جبکہ مستقل طور بنانے کے لیے پلاسٹک سرجری کرانی پڑتی ہے جوکہ ایک تکلیف دہ ہونے کے ساتھ مہنگا طریقہ ہے۔

ایسے تمام افراد جو کاسمیٹک سرجری کے متحمل نہیں ہو سکتے، وہ اپنے کان کے پیچھے ایک خاص چپکنے والی ٹیپ کا استعمال کرتے ہیں جو کانوں کو باہر کی طرف دھکیل کر ایلف کے کان کی شکل بنا دیتی ہے تاہم اس میں ڈر موجود رہتا ہے کہ کسی بھی وقت ٹیپ نکلنے کی صورت میں کان اپنی اصل شکل میں آسکتے ہیں ۔