صدر مملکت آصف علی زرداری نے تین صوبوں کے گورنرز کی تعیناتی کی منظوری دے دی۔ 

صدرآصف علی زرداری نے گورنربلوچستان، گورنرخیبرپختون خوا اورگورنرپنجاب کی تقرری کی منظوری دی۔

صدرمملکت نے پیپلز پارٹی سے تعلق رکھنے والے فیصل کریم کنڈی کو بہ طور گورنرخیبرپختون خوا اورسردارسلیم خان کو گورنر پنجاب تعینات کردیا۔

صدرآصف زرداری نے مسلم لیگ ن کے جعفرمندو خیل کو گورنربلوچستان کے عہدے پر تعینات کردیا۔

واضح رہے کہ گذشتہ روزچیئرمین پیپلز پارٹی بلاول بھٹو نے وزیراعظم شہبازشریف سے وزیراعظم ہاؤس میں ملاقات کی۔ ملاقات کے دوران مسلم لیگ ن اور پیپلز پارٹی کے درمیان جعفر مندوخیل کو گورنربلوچستان، فیصل کریم کنڈی کو گورنرخیبرپختون خوا اور سردار سلیم خان کو گورنرپنجاب مقررکرنے پراتفاق کیا گیا۔

وزیراعظم نے بلاول بھٹوکومل کرآگے بڑھنے پرزوردیا اورانھیں ایک بارپھرحکومت کاحصہ بننے کی پیشکش کی۔

یہ خبر مذید پڑھیں

گورنر پنجاب کے لیے نامزد ہونے والے سلیم حیدر خان کا تعلق اٹک سے ہے۔ سردارسلیم حیدرخان معاون خصوصی برائے اوورسیز پاکستانیز بھی رہ چکے ہیں جب کہ وہ وزیرمملکت برائے دفاع اور دفاعی پیدوار بھی رہ چکے ہیں۔

سردار سلیم حیدر خان 2008 میں اٹک سے این اے 59 سے ایم این اے بھی منتخب ہوئے تھے۔

فیصل کریم کنڈی کا تعلق خیبر پختونخوا کے ضلع ڈیرہ اسماعیل خان کے ایک بااثر سیاسی خاندان سے ہے اور 2008 میں وہ پہلی مرتبہ پاکستان پیپلز پارٹی کے ٹکٹ پر رکن قومی اسمبلی منتخب ہوئے۔

فیصل کریم کنڈی نے پہلی مرتبہ 2002 میں انتخابات میں حصہ لیا تھا لیکن کامیاب نہیں ہوئے تھے، بعد ازاں 2008 میں کامیاب ہوئے۔