مقبوضہ جموں و کشمیر کے بارے میں اسلامی تعاون تنظیم کے رابطہ گروپ (او آئی سی) نے تنازعہ کشمیر کے فوری اور پرامن حل پر زور دیا ہے۔

ترجمان دفتر خارجہ کے مطابق مقبوضہ جموں و کشمیر او آئی سی رابطہ گروپ کا اجلاس گیمبیا کے دارالحکومت بانجول میں اسلامی سربراہی کانفرنس کی سائیڈ لائن پر ہوا جس میں مقبوضہ کشمیر کی موجودہ سیکیورٹی صورتحال کا جائزہ لیا گیا۔

ترجمان نے بتایا کہ او آئی سی رابطہ گروپ برائے مقبوضہ جموں کشمیر کے اجلاس کی صدارت سیکریٹری جنرل برائے سیاسی امور باخصوصی ایلچی یوسف الدوبے نے کی

اجلاس میں او آئی سی رابطہ گروپ نے مقبوضہ جموں و کشمیر میں انسانی حقوق کی انتہائی سنگین صورتحال پر بھی غور کیا۔

نائب وزیراعظم اور وزیر خارجہ اسحاق ڈار نے او آئی سی رابطہ گروپ میں پاکستان کی نمائندگی کی اور او آئی سی رابطہ گروپ کو مقبوضہ کشمیر کی موجودہ صورتحال کے بارے میں بریفنگ دی۔

نائب وزیراعظم اسحاق ڈار نے کہا کہ بھارت سوچے سمجھے اور منظم انداز میں کشمیریوں کو ان کے بنیادی حقوق اور ازادی سے محروم کر رہا ہے۔

انہوں نے مزید کہا کہ اختلاف رائے کو دبانے کے لیے بھارتی حکام نے مقبوضہ کشمیر میں خوف اور ظلم کا ماحول پیدا کر رکھا ہے، بین الاقوامی برادری بھارتی رہنماؤں کے اشتعال انگیز بیانات کا نوٹس لے۔

ترجمان دفتر خارجہ نے مزید بتایا کہ او آئی سی مقبوضہ کشمیر رابطہ گروپ میں پاکستان سعودی عرب ترکی نائجر اور آذربائیجان شامل تھے جبکہ مقبوضہ کشمیر کے حقیقی نمائندہ وفد اور او آئی سی آزاد مستقل ہیومن رائٹس کمیشن کے اراکین بھی اجلاس میں موجود تھے۔