لاہور: پنجاب حکومت گندم کی خریداری کے حوالے سے حتمی پالیسی بنانے میں تاحال ناکام ہے، جس کے پیش نظر مسلم لیگ (ن) کے قائد نواز شریف کی ہدایات پر پارٹی کا ہنگامی اجلاس طلب کر لیا گیا ہے۔

پارٹی ذرائع کے مطابق پنجاب میں گندم کی خریداری کے معاملے پر پارٹی کا ہنگامی اجلاس ماڈل ٹاؤن مرکزی سیکرٹریٹ میں سیہ پہر 2 بجے منعقد کیا جائے گا جس کی صدارت نواز شریف کریں گے۔

ذرائع کا کہنا ہے کہ اجلاس میں وزیر اعظم شہباز شریف اور وزیر اعلیٰ مریم نواز بھی شریک ہوں گی جبکہ مسلم لیگ ن کے مرکزی قائدین گندم سے نپٹنے کے لیے اجلاس میں شرکت کریں گے۔

اس کے علاوہ اجلاس میں مسلم لیگ پنجاب کے سینیئر رہنما اور پارٹی عہدے دار بھی شریک ہوں گے۔

ذرائع نے مزید بتایا کہ مسلم لیگ ن کے قائدین اجلاس میں گندم خریداری کی پالیسی کے بارے میں مشاورت کریں گے جبکہ گندم کی خریداری کے حوالے سے قائم کمیٹی کی جانب سے بھی آج وزیر اعظم کو رپوٹ پیش جائے گی۔

واضح رہے کہ گندم درآمد اسکینڈل کی تحقیقات کے حوالے سے انکوائری کمیٹی آج وزیراعظم شہباز شریف کو رپورٹ پیش کرے گی، انکوائری کمیٹی نے گندم درآمد پر دستاویزات اور متعلقہ ریکارڈ کی تحقیقات مکمل کر لی ہیں۔

ذرائع کے مطابق دوران تحقیقات رمضان میں درآمد گندم میں کیڑے موجود ہونے اور 13 لاکھ میٹرک ٹن گندم خراب نکلنے کا انکشاف ہوا۔

دوسری جانب وزیراعظم شہباز شریف کو گندم اسکینڈل پر آج نواز شریف نے بھی طلب کر رکھا ہے۔

ملک میں ضرورت کی گندم موجود ہونے کے باوجود درآمد کے ذمہ داروں کا تعین کرنے کیلئے تحقیقات اب بھی جاری ہیں۔