سانحہ 9 مئی کے پیش نظر سیکیورٹی کے سخت انتظامات کرتے ہوئے اسلام آباد اور پنجاب میں دفعہ 144 نافذ کر دی گئی ہے۔

اس حوالے سے سی پی او راولپنڈی کا کہنا ہے کہ کسی غیر قانونی اجتماع یا ریلی کی اجازت نہیں ہوگی، خلاف ورزی کرنے والوں کے خلاف سخت کارروائی کی جائے گی۔

پولیس نے کہا ہے کہ امن و امان میں خلل ڈالنے والوں کو آہنی ہاتھوں سے نمٹا جائے گا، سینئر افسران فیلڈ میں خود سیکیورٹی کی نگرانی کریں گے۔

گزشتہ روز اسلام آباد پولیس کی جانب سے جاری کردہ ایک بیان میں کہا گیا تھا کہ اسلام آباد میں دفعہ 144 نافذ العمل ہے، شہر میں قانون کے خلاف اور بغیر اجازت احتجاج کرنے یا ریلی نکالنے کی اجازت نہیں دی جائے گی، اگر کسی نے 9 مئی کو قانون ہاتھ میں لینے کی کوشش کی تو اس سے قانون کے مطابق سختی سے نمٹا جائے گا۔

اسلام آباد پولیس کا مزید کہنا تھا کہ پولیس ہرگز انتشار برداشت نہیں کرے گی، کسی کو بھی قانون ہاتھ میں لینے کی اجازت نہیں دی جائے گی، قانون کی خلاف ورزی کرنے والوں کے خلاف قانون حرکت میں آئے گا۔

واضح رہے کہ پاکستان تحریک انصاف (پی ٹی آئی) کے چیئرمین بیرسٹر گوہر خان نے 9 مئی کو پُرامن احتجاج کرنے کا اعلان کر رکھا ہے۔

بیرسٹر گوہر خان نے 9 مئی واقعات سے متعلق جوڈیشل کمیشن بنانے کا مطالبہ بھی کیا ہے، تاہم پی ٹی آئی کے احتجاج میں ٹکٹ ہولڈرز شرکت کریں گے۔