لاہور: سردار سلیم حیدر کی گورنر نامزدگی پر پنجاب کے سینئر پارٹی رہنما نالاں ہوگئے۔

پیپلزپارٹی ذرائع کے مطابق پی پی وسطی اور جنوبی پنجاب کے متعدد رہنما سلیم حیدر کی گورنر پنجاب کی نامزدگی پر نالاں ہوگئے۔

پی پی ذرائع کا کہنا ہے کہ سینئر رہنماؤں کے بجائے سلیم حیدر کی نامزدگی سے پارٹی میں مایوسی ہے جب کہ سلیم حیدر کی گورنر نامزدگی دھڑے بندی کی کامیابی ہے۔

پی پی ذرائع کا کہنا تھا کہ سینئر رہنما یا سلیم حیدر کے بجائے نئے چہرے کو گورنر نامزد کیا جاتا، پی پی قیادت نے مشاورت کے بغیر گورنر پنجاب کی نامزدگی کی جب کہ سلیم حیدر کو پی ڈی ایم دور میں وزیر مملکت بنا کر نوازا گیا تھا۔

ذرائع نے بتایا کہ پی ڈی ایم دور میں سلیم حیدر کی وزیر مملکت کے لئے نامزدگی خلاف میرٹ تھی، نامزد گورنر پنجاب سردار سلیم حیدر صدر پیپلزپارٹی راولپنڈی ڈویژن ہیں جب کہ سلیم حیدر کی بطور پارٹی ڈویژنل صدر کارکردگی انتہائی مایوس کن رہی ہے۔

پی پی کا کہنا ہے کہ سلیم حیدر بطور ڈویژنل صدر راولپنڈی پارٹی کو منظم کرنے میں ناکام رہے ہیں جب کہ پنجاب میں سلیم حیدر سے زائد قربانیاں دینے والے رہنما اور کارکن موجود ہیں اور پنجاب سے متعدد سینئر رہنما سلیم حیدر کی نامزدگی پر نالاں ہیں۔

پی پی ذرائع نے یہ بھی بتایا کہ پنجاب سے پارٹی رہنما قیادت کو تحفظات سے آگاہ کرنے پر غور کر رہے ہیں، سلیم حیدر کو پی پی سینٹرل پنجاب کے مضبوط دھڑے کی حمایت حاصل تھی اور سردار سلیم حیدر مضبوط دھڑے کی حمایت سے گورنر پنجاب نامزد ہوئے۔

ذرائع نے کہا کہ راولپنڈی سے سینئر پی پی رہنما سلیم حیدر کے بڑے حمایتی تھے، راولپنڈی سے سینئر رہنما کو پنجاب کی گورنر شپ آفر تھی جب کہ راولپنڈی سے سینئر رہنما نے گورنر شپ لینے سے معذرت کی تھی۔

پیپلز پارٹی کا کہنا ہے کہ سلیم حیدر کا نام راولپنڈی سے سینئر رہنما نے تجویز کیا جب کہ معذرت کرنے والے سینئر رہنما نے ہی گورنر پنجاب کیلئے سلیم حیدر کا نام تجویز کیا۔

ذرائع نے مزید بتایا کہ اسلام آباد سے سینئر رہنما نے سردار سلیم حیدر کے نام کی حمایت کی اور پی پی قیادت نے دو رہنماؤں کی حمایت پر سلیم حیدر کا نام فائنل کیا۔