وفاقی وزیر برائے ریلوے شیخ رشید کی جانب سے ڈاکٹروں اور پیرامیڈیکل اسٹاف کے لئے پیغام منظر عام پر آگیا ہے۔

تفصیلات کے مطابق سماجی رابطے کی ویب سائٹ پر شیخ رشید نے کہا ہے کہ کرونا وائرس کے خلاف جنگ لڑنے والے حوصلہ مند ڈاکٹرز، نرسز، پیرا میڈیکل سٹاف اور دیگر کو سلام پیش کرتا ہوں۔

کرونا وائیرس کے خلاف جنگ لڑنے والے حوصلہ مند ڈاکٹرز، نرسز، پیرا میڈیکل سٹاف اور دیگر کو سلام pic.twitter.com/xOHd4sIvhd

— Sheikh Rashid Ahmad (@ShkhRasheed) March 27, 2020

دوسری جانب قومی کرکٹ ٹیم کے بالنگ کوچ وقار یونس  کا کہنا ہے کہ ڈاکٹرز اور نرسز کی حوصلہ افزائی کیجئے ، کورونا کے خلاف جنگ میں یہ  سب سے اہم سپاہی ہیں۔

سماجی رابطے کی ویب سائٹ ٹوئیٹر پر جاری ویڈیو میں وقار یونس کا  کورونا وائرس کے حوالےسے کہنا تھا  کہ سوشل میڈیا پہ اس وباء سے متعلق احتیاطی تدابیر دینے والے لوگوں کو سراہتا ہوں کہ وہ بہترین کام کررہے ہیں۔

انہوں نے مزید کہا کہ یہاں ضرورت اس امر کی ہے کہ ڈاکٹرز ،نرسز  اور پیرا میڈیکل اسٹاف کی حوصلہ افزائی کی جائے ، کیونکہ وہ اس جنگ میں سب سے اہم سپاہی ہیں۔

وقار یونس کا کہنا تھا کہ ان لوگوں کو حوصلہ ملے گا تو یہ آگے بڑھتے جائیں اور انشاءاللہ ، کورونا وائرس ایک دن دنیا سے غائب ہوجائے گا۔

واضح رہے کہ  وقار یونس کی اہلیہ ڈاکٹر فریال بھی کورونا  کے خلاف جنگ میں شامل ہیں اور ان دنوں آسٹریلیا کے شہر سڈنی کے ایک اسپتال میں ایمرجنسی ڈیوٹی پر مامور  ہیں ۔

وقار یونس نے  خود کو پاکستان سے سڈنی پہنچ کر 14 دن کا قرنطینہ کیا ہوا ہے۔