موجودہ ملکی و معاشی صورتحال پر بڑے سیاسی رہنماؤں نے ڈائیلاگ کو ڈیڈلاک کا حل قرار دیا ہے۔

سابق صدر ڈاکٹرعارف علوی ،چیئرمین پیپلز پارٹی بلاول بھٹو زرداری اور وزیراعظم کے مشیر برائے سیاسی امور رانا ثناء اللہ نے کھل کر اظہار کیا ہے۔

ان سیاسی رہنماؤں کا کہنا ہےکہ مذاکراتی نشست مشروط آمادگی کی وجہ سے نہیں ہورہی، قائدین سیاسی انا کو چھوڑ کر ملکی مفاد کی خاطر بات چیت کریں۔

 بلاول بھٹو زرداری کا کہنا ہےکہ سیاست دانوں نے آپس میں ہاتھ نہ ملایا تو پارلیمنٹ سے بھی مسائل کا حل نکلنے کی امید نہیں۔

 رانا ثناء اللہ کا کہنا ہےکہ گرینڈ ڈائیلاگ کیلئے بانی پی ٹی آئی کی ضمانت پر رہائی کے سوا کوئی آپشن نہیں۔

وزیراعظم کے مشیر برائے سیاسی امور رانا ثناء اللہ نے ایک نجی ٹی وی کے پروگرام میں گفتگو کرتے ہوئے کہاکہ گرینڈ ڈائیلاگ کیلئے ماحول سازگار بنانے کیلئے بانی پی ٹی آئی  کی ضمانت پر رہائی کے سوا کوئی آپشن نہیں ہے اور نواز شریف اس بات کیلئے تیار ہیں۔

انہوں نے کہاکہ بانی پی ٹی آئی کی ضمانت پر رہائی پر اتفاق ہو تو میں نہیں سمجھتا اس کیلئے کوئی مشکل ہوسکتی ہے، گرینڈ ڈائیلاگ جب بھی ہوگا غیرمشروط ہوگا۔

رانا ثناء اللہ نے کہاکہ ن لیگ، پیپلز پارٹی اور پی ٹی آئی حقیقت ہیں ، بانی پی ٹی آئی حقیقت ہیں تو نواز شریف اور آصف زرداری بھی حقیقت ہیں، گرینڈ ڈائیلاگ کا مرکزی ایجنڈا الیکشن کا شفاف انعقاد ہونا چاہئے۔