کراچی: میئر کراچی مرتضیٰ وہاب نے آبادی کے درست نہ ہونے کو کراچی کے لیے بڑا چیلنج قرار دے دیا۔

میئر کراچی مرتضیٰ وہاب نے جامعہ کراچی میں تقریب سے خطاب کیا جس میں انہوں نے کہا کہ بڑے شہروں کو منظم طریقے سے چلانے کے لیے ڈیٹا اہمیت کا حامل۔

انہوں نے کہا کہ مختلف نوعیت کی مینجمنٹ شہر کے لئے چیلنج ہوتی ہیں لیکن کراچی کے لیے بڑا چیلنج آبادی کا درست شمار نہ ہونا ہے۔

میئر کراچی کا کہنا تھا کہ کراچی کی آبادی دو کروڑ 3 لاکھ بتائی جاتی ہے لیکن درست آبادی کے شمار کے بغیر معاشی اور مالی طور پر شہر کو منظم کرنا مشکل ہے۔

مرتضیٰ وہاب کہتے ہیں کہ کراچی 1.6 بیلن پراپرٹی ٹیکس جمع کرتا ہے جب کہ بھارت کا شہر ممبئی 22 بیلن روپے پراپرٹی ٹیکس جمع کرتا ہے۔

میئر کراچی کا مزید کہنا تھا کہ کسی بھی شہر کو بہتر طریقے سے چلانے کے لیے فنائنشلی مضبوط ہونا ضروری ہے، پاکستان میں سیاسی استحکام نہ ہونے کی وجہ سے پالیسیوں میں تسلسل نہیں ہوتا۔

میئر کراچی مرتضیٰ وہاب نے جامعہ کراچی کے طالب علموں کو بلدیہ عظمیٰ کراچی کو مل کر چلانے کی آفر کردی۔

انہوں نے کہا کہ جامعہ کراچی کے طالب علموں کو موقع دیتا ہوں، وہ بلدیہ عظمیٰ کراچی آئیں اور  دیکھیں کراچی کیسے چلتا ہے۔

مرتضیٰ وہاب کا کہنا تھا کہ طالب علم آئیں اور بلدیہ عظمیٰ کراچی کو مل کر چلائیں، اگلی کانفرنس بلدیہ عظمیٰ کراچی کے کونسل حال میں رکھی جائے گی۔