اسلام آباد میں وزیر اعظم محمد شہباز شریف کی زیر صدارت وزارت منصوبہ بندی اور پبلک پرائیویٹ پارٹنرشپ اتھارٹی کے امور پر اہم اجلاس منعقد ہوا۔

اجلاس میں وزیر اعظم شہباز شریف نے کہا کہ پبلک سیکٹر ڈویلپمنٹ پروگرام کے ذریعے ایسے منصوبے لائے جائیں جس سے ملک میں پائیدار ترقی ممکن ہو۔

انہوں نے کہا کہ محصولات کی وصولی میں اضافے سے ترقیاتی منصوبوں کیلئے فنڈز میسر ہو سکیں گے، تمام بڑے قومی ترقیاتی منصوبوں کی تھرڈ پارٹی ویلیڈیشن لازمی ہو گی۔

 وزیراعظم نے ترقیاتی بجٹ اور پی ایس ڈی پی کے حوالے سے وزیر منصوبہ بندی کی سربراہی میں کابینہ کمیٹی تشکیل دینے کی ہدایت جاری کی۔

کمیٹی پی ایس ڈی پی پروگرامز کے حوالے سے لائحہء عمل تشکیل دینے کے حوالے سے قلیل مدتی، وسط مدتی اور طویل مدتی تجاویز مرتب کرے گی۔

وزیراعظم شہباز شریف نے وفاقی پی ایس ڈی پی اور صوبوں کے سالانہ ترقیاتی پلان  میں  ہم آہنگی اور روابط بہتر بنانے کی بھی ہدایت کی اور تمام وفاقی وزارتوں کو پبلک پرائیویٹ پارٹنرشپ منصوبوں کے حوالے سے تجاویز پیش کرنے کی ہدایت کی۔

اجلاس کے شرکاء سے گفتگو کرتے ہوئے وزیراعظم نے کہا کہ پبلک سیکٹر ڈویلپمنٹ پروگرام میں ایسے منصوبے لائے جائیں جس سے ملک کی پائیدار ترقی ممکن ہو سکے گی۔

اجلاس میں وفاقی وزیر منصوبہ بندی احسن اقبال ، وفاقی وزیر خزانہ و محصولات محمد اورنگزیب ،وفاقی وزیر اقتصادی امور احد خان چیمہ ، وزیر پیٹرولیم مصدق ملک، ڈپٹی چیئرمین پلاننگ کمیشن جہانزیب خان، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی ۔