پنجاب میں 2 ہزار ایکڑ پر گارمنٹ سٹی کے قیام کے منصوبے پر مشاورت کی گئی ہے۔

گارمنٹ سٹی منصوبے کے حوالے سے صوبائی وزیر صنعت چوہدری شافع حسین سے اپٹما پنجاب نارتھ کے صدر کامران ارشد کی قیادت میں وفد نے ملاقات کی، اور 2 ہزار ایکڑ رقبے پر گارمنٹ سٹی کے قیام کے حوالے سے مشاورت کی گئی۔

ملاقات میں چئیرمین اپٹما نے صوبائی وزیر صنعت کو ٹیکسٹائل سیکٹر کے مسائل سے بھی آگاہ کیا اور کہا کہ گارمنٹ سٹی کا منصوبہ انتہائی اہمیت کا حامل، اپٹما صوبائی حکومت کے ساتھ ہرممکن تعاون کرے گی۔

صوبائی وزیر صنعت چوہدری شافع حسین نے کہا کہ 2 ہزار ایکڑ رقبے پر بننے والے گارمنٹ سٹی میں اربوں روپے کی غیر ملکی اور ملکی سرمایہ کاری ہوگی، یہ حکومت کا لینڈ مارک منصوبہ ہوگا جس سے برآمدات بڑھیں گی۔

صوبائی وزیر کا کہنا تھا کہ صنعتی شہر میں نئے کارخانے لگنے سے روزگار کے نئے مواقع پیدا ہوں گے، اور قومی معیشت کے لئے بے حد اہمیت کے حامل اس منصوبے کو تیزی سے مکمل کیا جائے گا۔

چوہدری شافع حسین کے مطابق انڈسٹری کو سولر انرجی پر منتقل کرنے سے پیداواری لاگت کم ہوگی، نئے صنعتی شہر میں بھی سولر انرجی کو فروغ دیا جائے گا اور اس کے لیے مقامی سطح پر سولر مینوفیکچرنگ کے حوالے سے غیر ملکی سولر کمپنیوں سے بات چیت جاری ہے۔

اپٹما کے وفد نے گارمنٹ سٹی کے حوالے سے صوبائی وزیر صنعت چوہدری شافع حسین کو بریفنگ اورتجاویز دیں۔

اس ملاقات میں سیکرٹری صنعت و تجارت احسان بھٹہ ،چئیرمین ٹیوٹا بریگیڈیئر ریٹائرڈ محمد ساجد کھوکھر ،چئیرمین پیڈمک ،سی ای او پیڈمک ،سی ای او پنجاب سرمایہ کاری بورڈ اور متعلقہ افسران بھی موجود تھے۔