وزیر اعظم کے عزم برائے بحالی اسپورٹس کے تحت قومی اسپورٹس کانفرنس 2024 کا انعقاد آج ہو گا۔

اعلامیئے کے مطابق وزیر اعظم شہباز شریف کے عزم برائے بحالی اسپورٹس کے تحت قومی اسپورٹس کانفرنس 2024 کا انعقاد آج اسلام آباد میں منعقد کیا جائے گا۔

 وزارت بین الصوبائی رابطہ کے اعلامیئے میں کہا گیا ہے کہ کانفرنس میں پورے ملک سے پروفیشنلز،  ٹیکنیکل ایکسپرٹس، ایتھلیٹس، صوبائی سپورٹس بورڈز کے نمائندے، سپورٹس فیڈریشن کے صدور اور دیگر اسٹیک ہولڈرز شرکت کر رہے ہیں۔

 وفاقی وزیر برائے بین الصوبائی رابطہ احسن اقبال نے کہا کہ قومی اسپورٹس کانفرنس 2024 کا مقصد کھیلوں سے وابستہ تمام اسٹیک ہولڈرز کو اکٹھا کرنا ہے تاکہ ہمارے کھیلوں کے احیا میں درپیش چیلنجز اور مشکلات پر تبادلہ خیال کیا جا سکے۔

 انہوں نے کہا کہ مشترکہ کاوش اور بہترین حکمت عملی کے ذریعے، ہم ایک ایسا تعمیری ماحول بنانا چاہتے ہیں جہاں ہم اپنے  ایتھلیٹس کو  بین الاقوامی مقابلوں کے لیے تیار کر سکیں۔

 وفاقی وزیر کا کہنا تھا کہ کھیل ہماری زندگی کا ایک اہم حصہ ہیں جو ہمیں ذہنی و جسمانی طور پر چاق وچوبند رکھتے ہیں، انہوں نے کہا کہ ملک میں کھیلوں کی بحالی اور ترقی کے لیے وزیر اعظم پرعزم ہیں۔

  احسن اقبال کے مطابق وزیر اعظم محمد شہباز شریف کی  خصوصی ہدایت ہے کہ سال 2025 کو کھیلوں کا سال قرار دیا جائے۔

 وفاقی وزیر کا کہنا تھا کہ ہمارا مقصد واضح ہے کہ اپنے ایتھلیٹس کو اولمپک تمغوں کے معیار تک پہنچانا اور دیگر بین الاقوامی مقابلوں میں اپنی کارکردگی کو بڑھانا ہے۔

 ان کا کہنا تھا کہ وفاقی حکومت نے وزیر اعظم کی سربراہی میں ملک بھر میں کھیلوں کی ترقی کے لیے  ایسے اقدامات کئے ہیں جن کے مثبت اثرات آنا شروع ہوگئے ہیں اور اس کانفرنس کا انعقاد انہی اقدامات کا تسلسل ہے۔

 وفاقی وزیر کے مطابق وزیراعظم کی خصوصی توجہ، کھلاڑیوں کی میرٹ پر سلیکشن اور وزارت ہذا کے اصلاحی اقدامات کی بدولت پاکستان ہاکی ٹیم گمنامی سے نکل کر وکٹری سٹینڈ پر پہنچ گئی۔

 وفاقی وزیر احسن اقبال نے مزید کہا کہ ملک میں معاشی استحکام کے بعد معاشی نمو کا مرحلہ شروع ہو چکا ہے، ہم ملک میں کھیلوں کے انفراسٹرکچر کو اپ گریڈ کریں گے تاکہ کھیلوں کا موثر احیا ہو سکے۔