لاہور: پیٹرولیم مصنوعات کی قیمتوں میں کمی کے بعد وزیراعلیٰ مریم نوازشریف نے ٹرانسپورٹ کرایوں میں کمی یقینی بنانے کا حکم جاری کردیا۔

وزیر اعلیٰ پنجاب مریم نواز شریف کی زیر صدارت اہم اجلاس ہوا جس میں ٹرانسپورٹ ڈیپارٹمنٹ سے متعلق امور کا جائزہ لیا گیا۔

وزیر اطلاعات پنجاب عظمیٰ زاہد بخاری، صوبائی وزیر ٹرانسپورٹ بلال اکبر خان، چیف سیکرٹری، سیکرٹری ٹرانسپورٹ، سیکرٹری ہائر ایجوکیشن، کمشنر لاہور، ڈی جی ایل ڈی اے اور دیگر حکام نے اجلاس میں شرکت کی۔

وزیراعلیٰ پنجاب مریم نوازشریف نے تمام اضلاع میں انتظامیہ کو کرایوں میں کمی پر عمل درآمد یقینی بنانے کی ہدایت کردی ہے۔

مریم نوازشریف کا کہنا ہے کہ پیٹرولیم مصنوعات کے نرخ میں کمی کا فائدہ براہ راست عوام کو پہنچا چاہیے۔ ٹرانسپورٹ کے کرائے اور اشیائے خورد ونوش سمیت تمام دیگر اشیاء کے نرخ پر اثر انداز ہوتے ہیں، ٹرانسپورٹ کرائے کم کرکے عوام کو ریلیف دیں گے۔

وزیر اعلیٰ پنجاب نے لاہور میں پرپل اور بلیو لائن ٹرین کے لئے بہترین انٹرنیشنل کنسلٹنٹ سے رجوع کرنے کی ہدایت کی جب کہ مریم نوازشریف کو صوبے بھر میں 630 ایکو فرینڈلی بسوں کے بارے میں تفصیلی بریفنگ دی ہے۔

بریفنگ میں انہیں بتایا گیا کہ لاہور کے لیے 200 ایکوفرینڈلی ڈیزل ہائی برڈ بسیں لائی جارہی ہیں، لاہور میں 100 الیکٹرک بسیں پائلٹ پراجیکٹ کے طورپر چلائی جائیں گی۔

بریفنگ میں کہا گیا ہے کہ ملتان کے لیے 100، راولپنڈی 78، بہاولپور 42 اور فیصل آباد میں 110 ایکوفرینڈلی بسیں لائی جارہی ہیں۔

علاوہ ازیں سیکرٹری ٹرانسپورٹ احمد جاوید قاضی نے طلباء کے لئے بائیکس پراجیکٹ پر تفصیلی بریفنگ دی جس میں کہا گیا کہ چیف منسٹر یوتھ انیشیٹیو بائیکس کی ای بیلٹنگ کے بعد اسکرونٹنگ شروع کردی گئی ہے۔