چیئرمین سینیٹ یوسف رضا گیلانی اسلام آباد میں واقع اسلامی جمہوریہ ایران کے سفارتخانے پہنچے جہاں انہوں نے اپنے تعزیتی تاثرات قلمبند کیے۔

ترجمان ایرانی سفارت خانہ کے مطابق چیئرمین یوسف رضا گیلانی نے ایرانی سفیر سے ایران کے صدر ابراہیم رئیسی اور وزیر خارجہ حسین امیر عبداللہیان سمیت ہیلی کاپٹر حادثے میں جاں بحق ہونے پر تعزیت کا اظہار کیا۔

چیئرمین سینیٹ ایرانی صدر کے حادثےمیں جاں بحق ہونے پر گہرا دکھ ہوا، صدر رئیسی پاکستان کے مخلص دوستوں میں سے تھے، مسلم امہ نے ایک مخلص دوست کھودیا، پاکستان کے ایران کے ساتھ تاریخی برادرانہ تعلقات ہیں۔

دوسری جانب سابق امیر جماعت اسلامی سراج الحق بھی تعزیت کے لیے سفارتخانہ پہنچے اور اس دوران سابق ڈپٹی چیئرمین سینیٹ عبدالغور حیدری نے بھی ایرانی سفیر سے تعزیت کی۔

واضح رہے کہ گزشتہ روز پاکستان کے وزیر اعظم شہباز شریف اسلام آباد میں واقع اسلامی جمہوریہ ایران کے سفارتخانے گئے تھے۔

وزیر اعظم نے ایرانی سفیر سے ملاقات کے دوران شہید صدر سید ابراہیم رئیسی، وزیر خارجہ ڈاکٹر حسین امیرعبداللہیان اور ان کے ہمراہ وفد کی تعزیت اور تسلیت پیش کی اور وزیٹر بک میں تعزیتی کلمات تحریر کیے۔

وزیراعظم شہباز شریف نے کہا کہ صدر سید ابراہیم رئیسی اور وزیر خارجہ کی شہادت کی المناک خبر سے گہرا صدمہ ہوا ہے، غم کی اس گھڑی میں سوگوار خاندانوں اور ایرانی عوام سے دلی تعزیت کا اظہار کرتے ہیں۔

بعدازاں ایرانی میڈیا کی رپورٹ کے مطابق گزشتہ روز ہیلی کاپٹر حادثے میں ایران کے صدر آیت اللہ ابراہیم رئیسی  اور وزیر خارجہ  حسین امیرعبداللہیان سمیت تمام افراد جاں بحق ہوگئے تھے۔

ہیلی کاپٹر حادثہ تبریز سے 100 کلومیٹر دور پیش آیا جس میں مشرقی آذربائیجان کے گورنر مالک رحمتی، ایرانی سپریم لیڈر آیت اللہ خامنہ ای کے ترجمان آیت اللہ علی الہاشم، فلائٹ کریو، سیکیورٹی چیف اور باڈی گارڈ بھی جاں بحق ہوئے۔