انگلش کپتان جوز بٹلر کا پاکستان کے خلاف سیریز میں کچھ میچز نہ کھیلنے کا امکان ہے۔

انگلینڈ کرکٹ ٹیم کے وائٹ بال ٹیم کے کپتان جوز بٹلر پاکستان کے خلاف شروع ہونے والی ٹی ٹوئنٹی سیریز میں کچھ میچز سے محروم رہ سکتے ہیں۔

غیر ملکی خبر رساں ادارے کے مطابق انگلش کپتان کی اہلیہ لوئس امید سے ہیں جس کے باعث ان  کا کسی بھی وقت بلاوا آسکتا ہے اور اس دوران وہ میچز سے محروم ہوجائیں گے۔

اس سے قبل جوز بٹلر نے پاکستان کے خلاف سیریز کے لیے آئی پی ایل کو درمیان میں ہی الوداع کہہ دیا تھا۔

علاوہ ازیں انگلینڈ کے ہیڈ کوچ میتھیو میٹ نے بھی خاندانی مسئلے کی وجہ سے ابھی تک اسکواڈ کو جوائن نہیں کیا ہے جب کہ ان کی غیر موجودگی میں اسسٹنٹ کوچ نے پریکٹس سیشن کی نگرانی کی تھی۔

خیال رہے کہ پاکستان اور انگلینڈ کی ٹیموں کے درمیان 4 میچز پر مشتمل ٹی ٹوئنٹی سیریز کا آغاز 22 مئی سے لیڈز میں ہوگا جب کہ دوسرا میچ 25 مئی کو برمنگھم میں شیڈول ہے۔

دونوں ٹیموں کے درمیان تیسرا میچ 28 مئی کو کارڈف اور چوتھا و آخری میچ 30 مئی کو اوول میں کھیلا جانا ہے۔

واضح رہے کہ 22 مئی کو لیڈز میں ہونا والا پہلا میچ کا بارش سے متاثر ہونے کا امکان ہے، محکمہ موسمیات نے بدھ کی شام یارکشائر میں تیز بارش کی پیش گوئی کررکھی ہے۔