کرغزستان میں پھنسے پاکستانیوں کی وطن واپسی کا سلسلہ جاری ہے، تاہم بشکیک سے طلبہ کو لے کر پی آئی اے کی پہلی پرواز کراچی ایئرپورٹ پہنچ گئی ہے۔

وزیراعلیٰ سندھ سید مراد علی شاہ نے کرغستان میں پھنسے طالب علموں کی واپسی پر انکا استقبال کیا اور اس دوران انہوں نے گفتگو کرتے ہوئے کہا کہ کرغزستان میں پھنسے سندھ کے 205 طلبہ کو واپس لایا گیا ہے، صوبائی حکومت طلبہ کے واپسی سے متعلق مسلسل رابطے میں رہی ہے۔

ترجمان وزیراعلیٰ سندھ نے بتایا کہ طلبہ کے والدین اور رشتہ دار بھی کراچی ایئرپورٹ پر بڑی تعداد میں موجود ہیں۔

وزیراعلیٰ مراد علی شاہ نے کہا کہ کرغستان سے پاکستان تک سفر کا انتظام صوبائی حکومت نے کیا، اللہ کا شکر ہے کہ طالب علموں کی بحفاظت واپسی کو یقینی بنایا گیا، آج 205 طالب علموں کی واپسی ہوگئی ہے جن میں 55 لڑکیاں اور 150 لڑکے ہیں۔

کرغستان سے واپس آنے والے 99 طالبعلموں کا تعلق کراچی سے ہے، کرغستان سے واپس آنے والے حیدرآباد 22، خیرپور 13، نوشہرو فیروز 15، سکھر 12، نواب شاہ 12، بدین 5، دادو 5، میرپور خاص 5،  جیکب آباد 5، ٹنڈو آدم 3، جامشورو 2، کشمور 2، کندھ کوٹ، پنوعاقل اور تھرپارکر سے ایک ایک شامل ہیں۔

وزیراعلیٰ سندھ نے مزید کہا کہ سخت پریشانی میں حکومت سندھ بچوں کے والدین اور کرغستان میں پاکستانی سفارتخانے سے رابطے میں تھی۔

اس موقع پر کرغستان میں پہنسے طالب علموں کیلئے آواز اٹھانے اور مدد کرنے پر طالب علموں نے وزیراعلیٰ سید مراد علی شاہ کا شکریہ ادا کیا اور کہا کہ وزیراعلیٰ سندھ کے مشکور ہیں جنہوں نے ہماری داد رسی کے احکامات جاری کیے۔