اسلام آباد: چین پاکستان اقتصادی راہداری کی مشترکہ رابطہ کمیٹی کے اجلاس میں سی پیک کے دوسرے مرحلے میں سرمایہ کاری کے اہم امور طے کیے جانے کا امکان ہے۔

چین پاکستان اقتصادی راہداری کی مشترکہ رابطہ کمیٹی کا اجلاس آج ہو گا جس کی مشترکہ صدارت چیئرمین نیشنل ڈیولپمنٹ اینڈ ریفارم کمیشن اور وفاقی وزیر منصوبہ بندی احسن اقبال کریں گے۔

حکام وزارت منصوبہ بندی کے مطابق پاکستانی وزارت منصوبہ بندی اور چین کا این ڈی آر سی راہداری کیلئے اسٹریٹجک روڈ میپ اجلاس میں پیش کریں گے، مشترکہ رابطہ کمیٹی سی پیک میں فیصلہ سازی کا ایک اعلیٰ ادارہ ہے۔

حکام نے بتایا کہ اجلاس میں سی پیک دوسرے مرحلے کے تحت پانچ نئے اقتصادی راہداریوں پر ورکنگ گروپس قائم کیے جائیں گے، ان راہداریوں میں روزگار کی تخلیق کا راہداری، اختراع کی راہداری، گرین انرجی کی راہداری اور جامع علاقائی ترقی شامل ہیں جبکہ اہم منصوبوں کے اعلانات وزیر اعظم شہباز شریف کے دورہ بیجنگ کے دوران کیے جائیں گے ۔

ذرائع کا کہنا ہے کہ اجلاس میں سی پیک 2025-30 دوسرے مرحلے میں سرمایہ کاری کے اہم امور طے کیے جائیں گے اور سی پیک کی سیکیورٹی کیلئے ایک نیا مشترکہ ورکنگ گروپ قائم کرنے پر غور کیا جائے گا، سیکیورٹی ورکنگ گروپ دوسرے مرحلے میں سیکیورٹی کی تمام تفصیلات طے کرے گا۔

اس موقع پر پاکستان چینی کمپنیوں اور عملے کو فول پروف سیکیورٹی کی گارنٹی دے گا جبکہ سیکیورٹی ورکنگ گروپ میں چینی کمپنیوں کی سیکیورٹی چین کے معیارات کے مطابق بنائی جائے گی۔

ذرائع کے مطابق سی پیک کے دوسرے مرحلے کا سب سے اہم منصوبہ پاکستان میں ریلوے نظام کو جدید بنانے کا ہے، ریلوے کے ایم ایل ون منصوبے کیلئے بھی مشترکہ ورکنگ گروپ قائم کرنے کی تجویز ہے۔

ذرائع نے مزید بتایا کہ دوسرے مرحلے میں دونوں ممالک کے کاروباری گروپس مشترکہ منصوبے شروع کرنے پر غور کریں گے جبکہ کوہالہ پن اور آزاد پتن بجلی گھر، گوادر پاور پلانٹ، کراچی سرکلر ریلوے اور تھاکوٹ رائے کوٹ سڑک کی تعمیر ہوں گے۔